Category : Berriak home

DTK-k memoria aurkeztu du eta 2023aren balantzea egin du

DTK-k 2023ko ekitaldiari dagozkion urteko kontuak eta Erantzukizun Sozial Korporatiboari (ESK) buruzko Memoria aurkeztu ditu Administrazio Kontseiluan. Memoria jada eskuragarri dago web orrian: 2023.urteko memoria

2023. urtean DTK-k bere historiako bidaien marka hautsi du, eta hori izan da urteko ezaugarri bereizgarria. DTKn 2023an kontabilizatutako bidaien kopurua, Dbuseko eta Dbiziko zerbitzuak barne, 30.544.764 bidaiakoa izan da, eta 2022an 26.291.471 bidaiakoa izan zen.

Konpainia osatzen duten pertsona guztien ahaleginari esker, eta Udalari esker, akziodun den heinean, eta baita egunero-egunero garraio publikoaren alde egiten duten erabiltzaileei eta garraio publikoaren bilakaeraren oinarri diren aurrerapen teknologiko handiei esker ere, gaur egun Konpainia hiri garraioko enpresa eraginkor eta aurreratuetako bat da Europan.

1.Bidaiak Dbusen

2023.urtean Dbuseko zerbitzuetako autobus bidaiak 29.599.122 izan dira, eta aurreko urtean, berriz, 25.503.508 bidaia erregistratu ziren.

Linea erabilienei dagokienez, 2022an gehien erabili den linea 28-Amara-Ospitaleak izan da, eta horren atzetik 13-Altza eta 5-Benta Berri lineak. Hiru lineek AENORen kalitate ziurtagiria dute, Bidaiarien Garraio Publikoari buruzko UNE-EN 13816 arauak araututa, baina arauak ezartzen dituen konpromisoak, hiru linea horietan ez ezik, autobus flota osoan eta Konpainiaren eguneroko funtzionamenduan ere aplikatzen dira.

2. Bidaiak Dbizin

Dbiziko bidaiek 2023an izan duten bilakaeran nabarmena izan da eskariek izan duten igoera, aurreko ekitaldiarekin alderatuta handia izan baita. Hala, 2023an 945.642 bidaia erregistratu dira, eta pasa den urtean, berriz, 787.963 erregistratu ziren, hau da, bidaiek %20 egin dute gora. Horrek ekarri du batez beste egunean 339 km egitea bizikletan. Azpimarratzekoa da ohiko erabiltzaileek bizikleta elektrikoak nahiago dituztela argi eta garbi. Urtean egindako bidaia guztietatik, %62 bizikleta mota horrekin egin dira.

Sistemako abonatu kopuruari dagokionez, 2023ko irailean abonatuen kopuru maximoa erregistratu zen, 10.879 erabiltzaile; horrek esan nahi du sisteman %30 abonatu gehiago dagoela, 2022ko daturik onenaren aldean (8.370 abonatu 2022ko urrian).

Horrez gain, 2022an Dbizi izan zen AENORen ziurtagiria eskuratua zuen lehen enpresa, Garraio Publikoaren Kalitatea Kudeatzeko Sistemaren gaineko UNE-EN 13816 arauaren arabera, zeinak bere zerbitzuaren kalitatea aitortzen duen.

3. Kotxetegiak elektrifikatzea

2023an DTK-k Kotxetegiak elektrifikatzeko lanak esleitu ditu, eta, horri esker, beste autobus %100 elektriko batzuk gehitu ahal izango dira zerbitzuan. Zehazki, Kotxetegiak elektrifikatzeko azpiegituraren proiektua idaztea eta obra gauzatzea esleitu du. Lanen helburua da Konpainiaren elektromugikortasun beharrak asetzea, Donostiako autobus flota elektrifikatzeko prozesuan bete-betean sartuta.

Dbus zero emisioko flota bihurtzeko, instalazioetako azpiegitura elektrikoa eraldatu behar da. Flotako 4 autobus %100 elektrikoekin kotxetegietako hartune elektrikoak duen ahalmen guzti-guztia erabiltzen da. Horregatik, beharrezkoa da linea elektriko baten trazadurari ekitea Egiako banaketako transformazio azpiestaziotik Kotxetegien inguruetaraino, 1,5 kilometro inguruko distantzian, non sekzionamendu zentro bat egongo den. Sekzionamendu zentrotik zuzeneko hornidura elektrikoa banatzen hasiko da, transformazio zentroetatik igaroz.

Instalazioak elektrifikatzeko lan horiei esker, autobus elektriko gehiago sartu ahal izango dira, eta, horrela, urte batzuen buruan, azpiegitura elektriko berria erabat martxan dagoenean, Dbusek 8,5MW-ko ahalmena edukiko du, eta, beraz, Gipuzkoan potentzia gehien kontratatuta duen erakundeetako bat izango da.

2024ko urtarrilean hasi dira lanak, eta orain arte gutxi gora behera trazatuaren %50a egin da.

4. Flota elektrifikatzea

2023an DTK-k 12 m-ko beste 38 autobus %100 elektriko gehiagoren eta 18 m-ko beste 6 autobus %100 elektriko gehiagoren erosketa  esleitu dio MAN TRUCK & BUS IBERIA, SAUri. Horrela, 18 metroko lehen autobus %100 elektriko artikulatuak sartuko ditu flotan modu iraunkorrean.

Autobus %100 elektrikoak eta zero emisiokoak dira, eta Dbuseko flotaren ezaugarri guztiak betetzen dituzte, hau da, plataforma baxuak eta arrapala elektrikoak dituzte mugikortasun murriztua duten pertsonentzat, autobusa %100 irisgarri izan dadin. Era berean, ibilgailua erabat egokitzen da Dbusen baldintza teknikoetara, hala nola, gidariaren lanpostuaren diseinura eta erabiltzaileentzako lekuaren banaketara, besteak beste.

5. BEIren aurretiazko azterlanak

2023an, DTK-k lanean jarraitu du BEI-Bus Elektriko Adimendunaren sistema ezarri aurretiko fasean. Sistema 17 linean (Gros-Amara-Miramon) ezarriko da, Erdigunea eta Gros auzoa autobus eta Renfe geltokiekin, Amararekin, Donostiako Ospitale gunearekin eta Miramongo parke teknologikoarekin lotzen dituen linea baita. BEI proiektuaren barruan erabiltzaileen bidaia esperientzia hobetzeko hainbat ekintza sartzen dira.

Hobekuntza horien artean, azpimarratzekoa da bidaia denborak laburragoak izango direla, autobus horiek semaforoetan lehentasuna baitute, eta, beraz, trafikoak sor ditzakeen gorabeherak saihesten dira. Era berean, ibilbideak azkarrago egiten direnez, erabiltzaileek geltokietan eman behar duten denbora nabarmen murrizten da, eta, beraz, joan-etorrietarako erabili behar duten denbora osoa txikiagoa da.

6. Dbizi sistema zabaltzea

2023 sistema sendotzeko urtea izan da. Izan ere, bere geltokien eta bizikleta elektrikoen sarea handitu da, eta, horri esker, sistemak lurralde estaldura zabalagoa izan dezake eta errazago da mugikortasun jasangarria donostiarren egunerokotasunaren parte izatea.

2023an 21 geltoki berri jarri dira, eta 257 bizikleta elektriko gehiago sartu dira sisteman. Sistemaren handitze horrekin, Dbizi orain arte zerbitzurik ez zuten Donostiako guneetara iristen da, hala nola, Altzara, Bidebietara eta Añorgara. Horrela, hirian estaldura handiagoa eta bizikleta elektriko gehiago eskaintzen ditu, erabiltzaileen eskari handiari erantzuteko.

7. Bidaia txartela QR kodearekin ordaintzea inplementatzea

2023ko irailetik, bidaia txartela QR kodearekin ordaindu daiteke Dbuseko autobusetan. Sistema berritzaile hori Dbuseko linea guztietan erabil daiteke, eta bidaia txartela ordaintzeko beste aukera bat da, eskudirutan ordaindu ordez, Donostian autobusez bidaiatzea errazago eta erosoago eginda, “eassyago” eginda.

Dbusen app ofizialaren bidez eros daiteke bidaia txartela; appa, berriz, iOSen eta Androiden dago eskuragarri Horrela, beraz, lau garraio titulu berri daude erabilgarri:

  • 30 minutuko QR txartela, egunekoa: eguneko nahi beste zerbitzutan erabil daiteke, erosi eta hurrengo 30 minutuetan. Transbordoak egiten uzten du. Prezioa 1,85€ da.
  • 30 minutuko QR txartela, gauekoa: aurreko kasuan bezala, garraio titulu hau erosleak nahi beste gaueko zerbitzutan erabil dezake, erosi eta hurrengo 30 minutuetan. Prezioa 2,50€ da, eta transbordoak egiten ere uzten du.
  • 24 orduko QR txartela: Dbuseko autobusetan mugarik gabe bidaiatzeko aukera ematen du 24 orduz, bai eguneko zerbitzuetan, bai gaueko zerbitzuetan, eta 6€-ko prezioa dauka.
  • 48 orduko QR txartela: Dbuseko autobusetan mugarik gabe bidaiatzeko aukera ematen du 48 orduz, eta eguneko zein gaueko zerbitzuetan ere bai. Prezioa 10€ da.

8. Navilens gidatze sistema ezartzea

2023ko Mugikortasunaren Europako Astearekin batera, Dbusek markesinetan inplementatutako Navilens gidatze sistema jarri zuen abian. Distantzia handira irakur daitezkeen QR kodeen sistema bat da, ikusmen desgaitasuna duten pertsonei Donostiako autobus geltokiak modu autonomoan kokatzeko aukera ematen diena. Lokuzioen bidez, seinaleztapen sistema horrek aukera ematen du testuinguruan jarritako informazio eskuragarria lortzeko, hala nola geltokiaren izena, bai eta autobusen iritsiera ordua denbora errealean eta autobusen helmuga ere. Irismen handiko markagailu bisual horiek, halaber, baliagarriak dira beste dibertsitate funtzional sentsorial kognitibo motaren bat duten pertsonentzat, horiek ere orientatu eta informatu baitaitezke irudien eta seinale akustikoen bidez eskura daitezkeen edukiei esker.

9. Dbus, munduan ticketing berritzaileena duten 7 garraio enpresen artean

2023an Dbus izan da Transport Ticketing Global sarian, Garraio Enpresa Berritzaileenaren kategorian, finalista aukeratu dituzten zazpi enpresetako bat. Garraio publikoko ordainketa sistemak aitortzeko nazioartean ematen den ospe handiko saria da. Garraioa jasangarriagoa eta eraginkorragoa izan dadin berrikuntzak egitearen alde bikain ari diren garraio publikoko operadoreen lana azpimarratzen du sariak.

Ezarri dituen jarduera ugariri esker aukeratu dute Dbus. Jarduera horien artean ticketing sisteman egindako hainbat hobekuntza nabarmentzen dira, batez ere txartela ordaintzeko beste aukera batzuk ezarri izana (eskualdeetako garraio txartelak, hala nola, Mugi, Bat, Barik eta Txiktxak; EMV Contactless txartel adimendunak; mugikorretako QR kodea; etab.).

Azpimarratzekoa da sariarekin aitortzen dela garraio publikoa asko erabiltzen dela (Donostia da autobusen erabilera indizerik handiena duen hiria; donostiar bakoitzak 180 bidaia inguru egiten ditu, Europako erabilera kopuru handienetako bat eta antzeko tamaina duten gainerako hirietako erabilera kopuruaren oso gainetik), autobus zerbitzua etengabe hobetzen dela (abiadura komertziala eta puntualtasuna handiak dira), zerbitzuetan maila teknologiko aurreratua duela, ticketing sistemaren hobekuntzak egin direla eta kutsatzen ez duten garraiobideen erabilera sustatzeko hainbat ekimen egin direla. Faktore horiek guztiak funtsezkoak izan dira epaimahaiaren balorazioan eta Transport Ticketing Awards sari ospetsuan finalista gisa aitortzean.

10. Enpresa aktiboa da, hainbat lantaldetan eta forotan parte hartuz, esperientziak trukatuz. Kotxetegietara bisita teknikoak

2023an DTK-k hainbat jardunaldi, foro eta lantaldetan hartu du parte modu aktiboan, bai modu presentzialean, bai online formatuan.

  • Global Public Transport Summit kongresuan parte hartzea. Garraio Publikoaren Nazioarteko Batasunak (UITP) bi urtez behin egiten duen kongresua da

Jardunaldian, Dbusek Donostiaren kasuaren berri eman zuen, Donostia elektromugikortasun proiektuaren xede hiri gisa, eta flota elektrifikatzeko eta instalazioak egokitzeko Konpainian egindako urratsak azaldu zituen.

  • ATUCen Hiri eta Metropoliko Garraioari buruzko Urteko XXIX. Kongresuan parte hartzea

Dbusek autobus zerbitzuaren deskarbonizazio eta elektrifikazioaren inguruan antolatutako mahai inguruan parte hartu du.

  • “5G  Euskadi” proiektuaren bukaerako ekitaldian parte hartzea

Euskadin garatu den lehen 5G proiektu pilotua da, eta bere helburua da Euskal Herriko enpresa eta zentro teknologiko nagusien berrikuntza eta eraldaketa industriala bultzatzea.

Era berean, 2023an Dbusek hainbat bisita jaso ditu, eta horietan partekatu ahal izan ditu eskuratutako know-howa eta proiektuak. Bereziki nabarmentzekoak dira honako bisita hauek:

  • Israelgo Garraio Ministerioaren ordezkaritza bat. Bisitan zehar, ordezkaritzak egiaztatu ahal izan ditu Dbusek dituen SAE sistemaren (ustiapenean laguntzeko sistema) eta ticketing sistemaren
  • AGIR Frantziako elkarteko kideen ordezkaritza bat. Garraio publikoko operadoreetako 500 bat profesional eta Mugikortasun eta Garraioko enpresa, administrazio publiko eta adituak biltzen ditu elkarte horrek.
  • Bilbobusen ordezkaritza bat. Teknikariek osatutako ordezkaritza bat zen, eta Kotxetegietako instalazioak ezagutu ahal izan ditu, eta Donostiako autobus flotan instalatutako azken aurrerapen teknologikoak xehetasunez egiaztatu ere bai.

 

 

Irakurri

Dbizi-k Geltoki+ aurkeztu du: bizikleta elektrikoak aparkatzeko sistema berria

Helmugako geltoki jakin batzuk beteta daudenean erabili ahal izango da funtzionalitate berri hori.

Dbizik, Donostiako bizikleta sistema publikoak, Geltoki+ abian jarriko du. Dbizi sistemaren funtzionalitate berri bat da, eta bere helburua da herritarrei kalitatezko zerbitzua eta beraien beharretara egokitutakoa ematen jarraitzea. Funtzionalitatea apirilaren 2tik aurrera egongo da erabilgarri.

Hala, Dbizik aparkaleku gehiago eskainiko ditu bere 11 geltoki periferikoenetan, giltzarrapo adimenduneko sistema baten bidez. Giltzarrapo adimendunen sistema hori geltokiak beteta daudenean erabili ahal izango da.

Gaur goizean aurkeztu da sistema, eta, bertan, Mugikortasuneko eta Garraio Jasangarriko zinegotzi Olatz Yarzak hau nabarmendu du: “Dbizi sistema gaur egun herritarrek asko baloratzen eta erabiltzen duten zerbitzua da, eta, beraz, Geltoki+ funtzionalitatea ezarri nahi izan dugu, erabiltzaileen harrera on horri erantzuteko”. Horrez gain, hau ere esan du: “Etengabe ari gara lanean hobekuntzak bilatzen, bizikleta hiritik ibiltzeko lehentasunezko garraio gisa erabiltzea bultzatzen jarraitzeko”.

Geltoki+

Bizikleta elektrikoen atzeko gurpilean giltzarrapo adimendun bat jartzea izango da, berez, Dbiziren funtzionalitate berri hau ahalbidetuko duen sistema (bizikleta mekanikoetan ez da eskuragarri egongo). Izan ere, sistema horri esker, bizikletak aparkatzeko berariaz definitutako lekuetan aparkatu ahal izango da. Leku berezi horiek Dbiziko geltoki jakin batzuen inguruan kokatuta egongo dira, eta Dbiziko geltoki horietako aparkaleku guztiak beteta daudenean baino ezingo dira erabili.

Geltoki horiek Geltoki+ izenez ezagutzen dira, eta hiriaren erdigunetik urrunen dauden eta/edo hiriaren goialdeetan dauden auzoetako batzuetan egongo dira, auzo horietan Dbiziko geltokien arteko distantzia handiagoa baita. Horrela, beste aukera bat eskaintzen zaie helmugako geltokia beteta aurkitu eta hurbilen duten beste geltokia urrun samar geratzen zaienei.

Geltoki horietan arkua duten aparkalekuak jarriko dira bizikletetarako, eta aparkaleku horiek lokailu batzuk izango dituzte bizikletaren giltzarrapora lotzeko. Bizikleten aparkaleku horiek erraz identifikatu ahal izango dira, izan ere, kolore berdez margotuta daude, aparkaleku arruntetatik bereizteko.

Aparkatzeko prozesua

Bizikleta bat Geltoki+ batean aparkatzeko prozesua oso erraza eta intuitiboa da. Dbiziren appak Geltoki+ funtzioa aktibatuko du erabiltzailea Dbiziko geltoki horietako batera hurbiltzen denean, eta hura beteta dagoenean. Erabiltzailea Geltoki+ geltokira hurbildu beharko da, eta bizikletaren giltzarrapoa aparkalekuko arkuaren kableari lotu. Giltzarrapoa behar bezala itxita dagoenean, bidaia behar bezala amaitu dela jakinaraziko du aplikazioak.

Bizikleta Geltoki+ geltokietatik kanpo aparkatzen saiatuz gero (kalean, zerbitzu hori ez duten geltokietan), edo horietan aparkalekuak libre badaude, giltzarrapoa itxi egingo da, eta Dbiziren appak leku horretan aparkatzerik ez dagoela jakinaraziko du; beraz, erabiltzaileak 2 minutu izango ditu bizikleta desblokeatzeko eta baimenduta dagoen leku batean aparkatzeko. Erabiltzaileak jarraibideei jarraitzen ez badie, sistemak bizikleta blokeatuko du, baita erabiltzailearen kontua ere.

Erabiltzaileei laguntza handiagoa emateko, Dbizik bideo batzuk argitaratuko ditu bere web orrian (www.dbizi.eus), funtzionalitate berri hori azaltzeko.  Era berean, abonatu guztiek mezu elektroniko bat jasoko dute, sistema berriari buruzko informazio zehatzarekin.

 

 

 

 

 

 

 

 

Geltoki+ batean aparkatu ahal izateko bizikleta elektrikoek ezinbestez behar duten giltzarrapoa martxoan hasi da jartzen, eta jada 125 bizikletak dute instalatuta giltzarrapo hori. Aurreikusita dago ekainerako bizikleta elektriko guztiek aukera berri hori izango dutela.

Giltzarrapo adimendun berri horiek Garraio eta Mugikortasun Jasangarriko Ministerioaren (MITMA) Next GenerationEU funtsen bidez finantzatu dira.

Geltoki+ berrien kokalekuak

Geltoki+ berriak geltoki hauetan egongo dira, eta, geltokiaren arabera, giltzarrapoa duten 6-12 bizikleta elektriko aparkatzen utziko dute:

– Añorga+: 4 arku izango ditu, eta gehienez 8 bizikleta aparkatu ahal izango dira.

– Buenavista+: 5 arku izango ditu, eta gehienez 10 bizikleta aparkatu ahal izango dira.

– Herrera+: 5 arku izango ditu, eta gehienez 10 bizikleta aparkatu ahal izango dira.

– Zubiaurre+: 5 arku izango ditu, eta gehienez 10 bizikleta aparkatu ahal izango dira.

– Nornahi+: 3 arku izango ditu, eta gehienez 6 bizikleta aparkatu ahal izango dira.

– Atarizar+: 3 arku izango ditu, eta gehienez 6 bizikleta aparkatu ahal izango dira.

– Munto+: 6 arku izango ditu, eta gehienez 12 bizikleta aparkatu ahal izango dira.

– Andoain+: 5 arku izango ditu, eta gehienez 10 bizikleta aparkatu ahal izango dira.

– Tranbia+: 3 arku izango ditu, eta gehienez 6 bizikleta aparkatu ahal izango dira.

– Urbia+: 5 arku izango ditu, eta gehienez 10 bizikleta aparkatu ahal izango dira.

– Bartzelona hiribidea+: 5 arku izango ditu, eta gehienez 10 bizikleta aparkatu ahal izango dira.

 

 

Irakurri

Man Truck & Bus-en Turkiako, Alemaniako eta Espainiako ordezkaritzen bisita jaso du Dbus-ek

Dbusek MAN Truck & Busen Turkia, Alemania eta Espainiako ordezkaritzetako talde baten bisita jaso du. Autobus elektrikoen produktu eta garapeneko ingeniariek osatzen zuten taldea. Lan jardunaldi horiek Kotxetegietan egiten ari den elektrifikazio prozesuaren barruan egin dira.

Datozen 12 hilabeteak funtsezkoak dira autobus flota deskarbonizatzeko trantsizioan, denbora tarte horretan Dbusek aurreikusten baitu beste 43 autobus erabat elektriko gehiago jasotzea. Horrela, flotaren %33 autobus %100 elektrikoak izango dira 2025eko lehen hiruhilekoan. Autobus horien guztien erosketa MAN Truck & Bus Iberiari esleitu zaio, eta Next Generation funtsen bidez finantzatuko dira, Garraio, Mugikortasun eta Hiri Agendako Ministerioaren (MITMA) dirulaguntzari esker.

Hori dela eta, Dbusen eta MAN Truck & Busen arteko topaketarako jardunaldi hauek antolatu dira, garatzen ari diren lanen berri emateko elkarri, eta Dbusen elektrifikaziorako egingo den eraldaketan inplikatutako alde guztien arteko sinergiak ezartzeko.

Jardunaldiak oso aberasgarriak izan dira, eta gai batzuetan sakontzeko aukera eman dute, esaterako, autobus elektrikoen garapenean, gure instalazioen kargako azpiegitura elektrikoetan, karga puntuen eta kudeaketa softwarearen arteko komunikazio protokoloetan; azken batean, Dbusi zerbitzuaren benetako egoeraren kontrola izatea eta arazoen konponbidean aurrea hartzea ahalbidetuko dioten soluzioetan sakondu ahal izan dute.

Bilera horietan, gainera, Dbusek bere segurtasun plan berria aurkeztu du. Plan horretan jasotzen dira elektrifikazioaren ondorioz aurre egin beharreko erronka berriak, besteak beste, suteen aurkako plana eta atoian eramateko probak.

Elektrifikazio lanak

 Joan den urtarrilaren 22an hasi ziren kotxetegietako instalazioen azpiegitura elektrikoa berritzeko lanak. Obra honen helburua da linea elektriko baten trazadura egitea, Egiako banaketako azpiestazio transformatzailetik Kotxetegien ingurura, gutxi gorabehera 1,5 kilometroko trazadura, non sekzionamendu zentro bat egongo den, eta zentro horretatik, zuzeneko hornidura elektrikoaren banaketa hasiko da, transformazio zentroetatik igarota. Gaur egun, trazaduraren %35 eginda dago; beraz, obra gauzatzeko aurreikusitako epeak betetzen ari dira, maiatzaren amaierarako bukatzea espero baita.

Kotxetegien instalazioen barruan, berriz, aparkalekuko 119 plazetako hartunea egokitzen ari da, horri esker autobus elektriko berriak gehitu ahal izango dira-eta.

 

 

Irakurri

Dbus-ek hitzarmen sinatu du genero indarkeriaren biktima diren langileen enpresen arteko mugikortasuna errazteko

Dbusek, garraio publikoko 8 operadorerekin batera, lankidetza hitzarmen bat sinatu du gaur, ekimenari atxikitako 8 erakundeetakoren bateko kide izan eta genero indarkeriaren biktima diren langileen enpresen arteko mugikortasuna errazteko. Dbusez gain, hauek dira hitzarmen honekin bat egin duten enpresak: Ferrocarrils de la Generalitat de Catalunya (FGC), TUGSAL, Emtusa, Alsa, TRAM, Sagales eta Vectalia.

Hitzarmenaren helburua da genero indarkeriaren biktima diren langileei lan alternatiba bat eskaintzea, eta erasotzailearengandik urruntzen laguntzea, babes sozialeko beste neurri batzuk seguru eskuratzeko modua eskainiz. Horrela, enpresa sinatzaileren batek plantillan genero indarkeriaren biktimatzat jotzen den langile bat badu eta langile horren kasuari erantzun behar badio, hitzarmenaren babespean jartzen diren gainerako enpresekin harremanetan jarri ahal izango da, eta horietako batean lan egiteko lanpostuen proposamenak jaso ahal izango ditu.

Lan alternatiba bat eskaintzeko aukera, hitzarmen honetan jasotzen den bezala, genero indarkeriaren aurkako babes integraleko neurriei buruzko 1/2004 Lege Organikoak baldintza horietan dauden emakume langileei dagokienez ematen dituen mandatuan eta babes berezian oinarritzen da. Lege Organikoak berariaz aurreikusten du genero indarkeriaren biktima den langileak mugikortasun geografikorako eskubidea duela, bai eta langabeziara jotzeko eskubidea ere, lan harremana deuseztatu beharrean ikusten badu bere burua. 2018an, Administrazio Publikoaren Konferentzia Sektorialak dagoeneko akordio bat lortu zuen langile publikoen babesaren arloan, eta, hala, estatuko administrazioen arteko mugikortasuna eta neurri bereziak ezarri ziren.

Zortzi konpainiek agintzen dute langilearentzat proposatuko duten lanpostuaren ezaugarriak hark jatorrizko enpresan betetzen zuen lanpostuak zituenen ahalik eta antzekoenak izango direla, eta langilea lanpostu horretan benetan hartuko duela. Langileak lanpostua gordeta izango du jatorrizko enpresan.

 Berdintasunarekiko konpromisoa

Dbusek ahalegin guztiak egin ditu erakundearen barruan berdintasuna sustatzeko. Hala, 2010ean, I. Berdintasun Plana jarri zuen abian, eta urte horretan bertan, Emakumearen Euskal Erakundeak – Emakunde“Emakumeen eta Gizonen Berdintasunerako Erakunde Laguntzaile” gisa aitortu zuen. Gaur egun, Dbus III. Berdintasun Plana ezartzen ari da.

Era berean, 2018tik, Dbus BAI SAREAko kidea da, Emakunde Emakumearen Euskal Erakundeak bultzatuta emakumeen eta gizonen arteko berdintasunean laguntzen duten erakundeek osatutako sareko kidea, alegia, lan eremuan berdintasuna bultzatzeko eta bermatzeko helburuarekin.

Gaur sinatutako hitzarmen honekin, Dbusek irmoago bultzatuko du erakundearen berdintasun politikaren egungo mailak hobetzen jarraitzera.

 

Irakurri

Dbizi-k beste hobari bat gehiago du familia ugarientzat

Dbizi bizikleta sistema publikoak herritarrei zerbitzurik onena eskaintzeko lanean jarraitzen du, eta, beraz, apirilaren 1etik aurrera familia ugariek beste hobari bat izango dute bizikleten erabileragatik, eta ez bakarrik abonamenduaren kontratazioan, orain arte bezala. Tarifa horri aplikatuko zaion deskontua %20koa izango da familia ugarien kategoria orokorrerako, eta %50ekoa berezirako.

Olatz Yarza Mugikortasun eta Garraio Jasangarriko zinegotziak nabarmendu duenez, “neurri honek hirian bizikleta publikoaren erabilera sustatzen jarraitu nahi du, baita karga ekonomiko gehien izan dezaketen familien artean ere, hala nola familia ugarien artean. Yarzak esan du, gainera, “zerbitzua gero eta sendoagoa dela, eta 2023an berriro hautsi dela abonatuen eta erabileren errekorra, urte horretan sistema handitu baita, bai geltoki kopuruari dagokionez, bai bizikleta kopuruari dagokionez”

Hain zuzen ere, 2023an, bidaien bilakaeran nabarmena izan da eskaerak asko hazi baitira aurreko ekitaldiarekin alderatuta. Zehazki, 2023an 945.642 bidaia erregistratu dira, eta pasa den urtean, berriz, 787.963 izan ziren, hau da, %20 inguruko hazkundea erregistratu da. Igoera horrek esan nahi du 2023an 123.937 km ibili direla guztira, hau da, egunean 339 km batez beste. Aurreko urtean 96.010 km egin ziren, batez beste 263 km egunean.

 

 

 

 

 

 

 

2023an, Dbiziren historiako abonu gehien erregistratu dira, eta urrian 10.879 abonatu izan dira, hau da, 2022an erregistratutako daturik onena baino %30 gehiago, orduan 8.370 abonamendu erregistratu baitziren. 2023an, joera berdina izan da abonu motari dagokionez, eta urteko iraupena duen banakako abonu arrunta nagusitu da.

Hilabeteko iraupena duten noizbehinkako abonuek, banakakoek zein taldekoek, presentzia handiagoa izan dute uztailetik irailera bitartean.

Bizikleta elektrikoa eta 30 minututik beherako bidaiak nagusi

Kopuruek adierazten dutenez, jendeak oraindik ere argi eta garbi nahiago du bizikleta elektrikoa, 2023an erregistratutako bidaien %62,34 bizikleta elektrikoan egin dira-eta.

Urriaren 6an erregistratu zen bizikleten erabilerarik handiena, 5.232 bidaia egin baitziren. Orain arte, errekorra 2022ko irailaren 22an erregistratutako bidaia kopurua zen, orduan 3.667 joan-etorri erregistratu baitziren.

Era berean, garrantzitsua da azpimarratzea Dbiziko bizikletetan egindako bidaia bakoitzaren batez besteko iraupena 12 minutu eta 10 segundokoa izan dela, hau da, oraindik ere 15 minutu baino gutxiagokoa da, aurreko urtekoaren oso antzekoa. Bidaien %97 izan dira 30 minutu baino gutxiagoko iraupenekoak.

Dbiziren erabiltzailearen profilari dagokionez, generoaren araberako banaketan azken urteetako datuak mantendu dira, hau da, %53 gizonak dira eta %46 emakumeak. Bestalde, erabiltzaileen batez besteko adina nabarmen jaitsi da azken urtean, 37 urtekoa baita, eta aurreko urtean 42 urtekoa izan zen.

Sistema zabaldu da 2023an

2023an, Dbizi zerbitzua nabarmen handitu da. Zehazki, beste 21 geltoki gehiago inauguratu dira, eta, esaterako, Altza, Bidebieta edo Añorga auzoetara iritsi da zerbitzua. Horrela, zerbitzua 47 geltoki izatetik 68 izatera igaro da, eta horrek esan nahi du %44 geltoki gehiago direla.

Horrez gain, beste 257 bizikleta elektriko gehiago sartu dira flotan, sistema handitu aurretik erabilgarri zeuden 120 bizikleta elektrikoen aldean.

Zerbitzu handitze horrekin, hiriko leku gehiagotara iristen da zerbitzuarekin eta bizikleta elektriko gehiago eskaintzen dira erabiltzaileen eskari handiari erantzuteko.

Tarifak eta deskontuak 2024an

Hiriaren goialdeetan dauden auzoetako bizilagunen artean bizikletaren erabilera sustatzeko, Dbizik %40ko deskontua eskainiko die aurrerantzean ere bidaia tarifetan bizikleta elektrikoa erabiltzen dutenei, baldin eta bidaiaren jatorriko edo helmugako geltokia Aiete, Egia, Altza, Bidebieta, Trintxerpe, Intxaurrondo, Martutene edo Añorga bezalako guneetan denean.

Bestalde, Dbizi handitzearen ondorioz, bizikleten eta geltokien mantentze lanen eta logistikaren kostua nabarmen handitu da azken hilabeteetan. Horregatik, eta inflazioren ondoriozko kostuak eta zerbitzua zabaltzeak ekarritako kostuak neurri batean arintzeko, pentsatu da 2022tik izoztuta zeuden tarifak eguneratzea apirilaren 1etik aurrera.

Hala ere, abonu arrunta edo noizbehinkakoa egun hori baino lehen kontratatuta duten erabiltzaileei, prezioak mantenduko zaizkie kontratatutako abonuaren mugaeguneratu arte.

Hurrengo taulan apirilaren 1etik aurrera aplikatuko diren tarifa berriak ikus daitezke:

 

 

 

 

 

 

 

 

 

 

 

 

Tarifa sistema berri hau modu mailakatuan ezarriko da, abonuak berritu ahala, eta sistema osoan %2ko igoera ekarriko du benetan 2024ko urtean.

Irakurri

Dbusek autobus bat eman dio Autobusaren Lagunen Gipuzkoako Elkarteari

Donostiako Tranbia Konpainiak autobus bat eman dio Autobusaren Lagunak Gipuzkoako Elkarteari (AGABUS). Autobusa zaharra da, 2004an flotatik erretiratutakoa eta kotxetegietan zegoena. 318 ibilgailua da, Mercedes Benz markako 0405 modelokoa. Autobus hori 18 urtez ibili da Donostiako kaleetan.

DTK-k 1987an, Konpainiaren lehen zerbitzuaren mendeurreneko urte berean, Mercedes Benz markako lehen autobus sorta bat jaso zuen, 33 autobuseko sorta bat, eta horietako bat da Mercedes Benz markako 0405 modeloko ibilgailu hori. Ordura arte, hirian ibili ziren autobusak Pegaso markakoak izan ziren.

Autobus horiek sartutakoan, zoru altuko autobusak deiturikoak, hau da, eskailera mailak zituzten autobusak ez ziren gehiago erabili. Ibilgailu horiek kendu ahala, %100 irisgarriak diren eta zoru baxua eta mugikortasun urriko pertsonak edo haurren kotxeak/aulkiak sartzeko arrapala duten autobusak sartzen joan ziren, kendutakoen ordez.

Gaur egun, Dbus bere flota eraldatzeko prozesu batean murgilduta dago, eta bere helburua da 2030erako flotako ibilgailu guztiak %100 elektrikoak eta zero emisiokoak izatea. Jarduera hori egin ahal izateko, beharrezkoa da kotxetegietako instalazioen azpiegitura elektrikoa eraldatzea, eta obra horiek 2024an hasi dira. Obra horiek 318 autobusa aparkatuta egon den eremuari eragiten diote zuzenean, eta, hori dela-eta, konpainiak autobusa bere instalazioetatik erretiratu behar izan du.

Ibilgailu hori flotatik erretiratu zenetik, Agabus arduratu da ibilgailua mantentzeaz. Horregatik, eta kotxetegietan mantentzeko lekurik eta baliabiderik ez dagoenez, Dbusek autobus horren dohaintza eskaini dio Elkarteari, eta dohaintza hori gauzatzeko akordio bat sinatu da gaur. Era berean, Agabusek konpromisoa hartzen du DTKrekin elkarlanean aritzeko ekitaldi berezietan, hala nola urteurrenetan, erakusketetan, etab., konpainiarekin lotutako hainbat material historiko eskainiz, baita, Dbusek hala eskatzen badio, gertakari puntual horietarako 318 autobusa utziz ere.

Urteak dira DTKren eta Agabusen arteko harremanak hasi zirela. Agabus ibilgailu hori mantentzeaz arduratu da ibilgailua flotatik erretiratu zenetik, eta, mantentze lan horrez gain, konpainiaren 125. 130. eta 133. urteurrenak direla-eta egindako erakusketetan ere lagundu du Elkarteak. Ekitaldi horietarako, Elkarteko kide batzuek DTKrekin lotutako hainbat material utzi zuten.

Autobusaren Lagunen Gipuzkoako Elkartea 2007an sortu zen. DTK-ko langile talde batek  sortu zuen, konpainiak jada erabiltzen ez dituen ondasun materialak mantentzearekin eta kontserbatzearekin lotutako jarduerak proposatzeko eta enpresa zuzendaritzarekin batera jarduera horietan aritzeko. 17 urte geroago, harreman hori sendotu egin da bi aldeek sinatutako akordio honekin.

 

 

Irakurri

Dbus-ek zerbitzua elektrifikatzeko obrak hasi ditu

EDS INGENIERÍA Y MONTAJES SAUk eta ALTUNA Y URIA SAk osatutako ABEEa arduratuko da Egiako banaketako transformazio azpiestaziotik Kotxetegien inguruetaraino linea elektriko baten trazadurari ekiteaz.

Gaur astehelena, urtarrilak 22, Kotxetegietako instalazioen azpiegitura elektrikoa eraldatu eta autobus %100 elektriko gehiago sartzen utziko duten obrak hasi dira.

Dbus eraldatu eta zero emisioko flota bihurtzeko, ezinbestekoa da instalazioetako azpiegitura elektrikoa eraldatzea. Gaur egun, flotako 4 autobus %100 elektrikoekin kotxetegietako hartune elektrikoak duen ahalmen guzti-guztia erabiltzen da. Horregatik, beharrezkoa da linea elektriko baten trazadurari ekitea Egiako banaketako transformazio azpiestaziotik Kotxetegien inguruetaraino, 1,5 kilometro inguruko distantzian, non sekzionamendu zentro bat egongo den. Sekzionamendu zentrotik zuzeneko hornidura elektrikoa banatzen hasiko da, transformazio zentroetatik igaroz.

 

 

 

 

 

 

 

Eraginak

Obrak 4 hilabete inguruko iraupena izango du, eta bizilagunei ahalik eta gutxien eragiteko, lanak egingo dituen enpresa esleipendunak, EDS INGENIERÍA Y MONTAJES SAUk eta ALTUNA Y URIA SAk osatutako ABEEak, obra zatika egitea proiektatu du, zati bakoitzaren iraupena gehienez 5 egunekoa izanik

Gune hauek eragingo ditu obrak: Alkolea pasabidea, Egia kalea, Aldapa kalea, Tolaregoia kalea, Gabriel Aresti pasealekua, Ametzagaña kalea, Polloe plaza, Sibilia kalea, eta Fernando Sasiain.

Obra gaur hasi da, Txurkoene kalean, 11 eta 19 zenbakien artean. Horretarako, obra zuzendaritzak jakinarazi du lanak egiten diren egunetan, gutxi gorabehera aparkaleku batzuetan eta alboko espaloian nabarituko dela lanen eragina. Galtzada eta etxebizitzetarako sarbidea, berriz, erabat libre geratuko dira.

Urtarrilaren 29ko astean, Txurkoene kaleko beste zatia egingo da, hau da, 1 eta 11 zenbakien arteko zatia. Lehen zatian bezala, obrek aparkalekuei eta alboko espaloiari eragingo diete. Galtzadari eta etxebizitzetarako sarbideari ez diete batere eragingo.

Obrek aurrera egin ahala, eta kaltetutako guneetara hurbildu ahala, gutun bat bidaliko zaie auzokoei, obren iraupena eta eraginak jakinarazteko, Txurkoene kaleko bizilagunekin egin den bezala. Gainera, auzokideren batek zalantzaren bat izanez gero edo informazio gehiago nahi izanez gero, enpresa eleipendunak harremanetarako telefono bat emango du jakinarazpen horretan.

Flotaren elektrifikazioa

Kotxetegiak elektrifikatzeko prozesuaren lehen fase honetan, kargatzeko hartune guztiak egingo dira, guztira dauden 119 aparkaleku plazetaraino. Horrez gain, kargatzeko 32 puntu, 60 pantografo alderantzikatu eta horiei dagokien euskarri egitura metalikoa gehituko dira. Instalazioak elektrifikatzeko lan horiei esker, beste autobus elektriko gehiago sartu ahal izango dira, eta, horrela, urte batzuen buruan, Dbusen azpiegitura elektriko berria erabat martxan dagoenean, Dbusek 8,5MW-ko karga ahalmena edukiko du, eta, beraz, Gipuzkoan potentzia gehien kontratatuta duen erakundeetako bat izango da. Aurten bertan hasiko da autobus %100 elektriko gehiago sartzen, instalazioen elektrifikazio lanak amaitu ondoren. Zehazki, 2024an 12 metroko 23 autobus %100 elektriko eta 18 metroko sei autobus elektriko (artikulatuak) jasotzea aurreikusten da.

Berrikuntza horri esker, kalkulatzen da urtean 960.000 litro gasolio gutxiago kontsumituko direla eta 2.600 tona CO2 gutxiago igorriko direla.

Next Generation funtsen finantzaketa

Obra hau eta lehen 30 autobusen erosketa Next Generation funtsek finantzatuta egingo dira. Autobus horietatik, 12 metroko autobus batek Industria, Merkataritza eta Turismo Ministerioaren Helmugetako Jasangarritasun Turistikoko planaren ezohiko deialdiaren bidez dirulaguntzak jaso ditu, eta gainerako ibilgailuak Garraio, Mugikortasun eta Hiri Agenda Ministerioaren (MITMA) dirulaguntzarekin erosiko dira. Lizitazio horien ondoriozko inbertsioa 23.456.613,82 €-koa da, eta Next Generation Europako funtsen bi deialdien dirulaguntza osoa 10.056.492 €-koa da.

 

Irakurri

Dbus-ek bidaia kopuru errekorra gainditu du 2023an

2023. urtea Dbusek bere historia osoan bidaien marka hautsi duen urtea izan da. Guztira 29.599.122 bidaia erregistratu dira, hau da, bidaiarien %16,05eko hazkundea 2022koaren aldean, orduan 25.503.508 bidaia erregistratu baitziren.

Zifra horien arabera, 2023. urtea lehen postuan dago urtebetean egindako bidaien rankingean, Konpainiak Donostiako udalerrian zerbitzuak eskaintzen dituenetik:

  • urtea: 29.599.122 bidaia
  • urtea: 29.583.538 bidaia
  • urtea: 29.216.698 bidaia
  • urtea: 29.168.773 bidaia
  • urtea: 29.015.007 bidaia

Azken 10 urteetan, bidaia eskariaren bilakaera hau izan da:

 

 

 

 

 

 

 

 

Gainera, garrantzitsua da azpimarratzea Dbusen zerbitzuen erabilerak lanegunetan zein larunbat, igande eta jaiegunetan egin duela gora, baita Gautxori zerbitzuetan ere.

Beraz, datu horiekin, egiaztatzen da Dbusek berreskuratu egin duela Donostian pandemiaren aurretik zuen eta 2019an goia jo zuen garraio publikoaren erabilera maila.

2023a zenbakitan

2023an, 28-AMARA-OSPITALEAK-BOULEBAR linea izan da erabiliena, 3.746.879 bidaiarekin, eta ondoren 13-ALTZA linea 3.691.814 bidaiarekin eta 5-BENTABERRI linea 2.769.502 bidaiarekin erregistratuta.

Hiri autobusak gehien erabili diren hilabeteak izan dira iraila, Dbusen historian hilabete bakarrean egindako bidaien kopururik handiena izan baitu, 2.657.183 bidaiarekin, eta ondoren abuztua, 2.621.695 bidaiarekin, Konpainiaren historian hirugarren postua lortuta historia osoko hilabete batean egindako bidaia kopuruaren rankingean; azaroan 2.614.137 bidaia erregistratu dira, hilabeterik onenen artean laugarren postuan, eta urrian 2.610.029, Dbusek bidaia gehien egindako hilabeteen bosgarren postuan. Beraz, 4 hilabete horiek Donostiaren historian hiriko autobus zerbitzua gehien erabili den 5 hilabeteen artean daude.

Autobusa gehien erabili den urteko egunak hauek izan dira: abenduaren 21a (San Tomas) 120,16 bidaiarekin, urtarrilaren 19a (San Sebastian bezpera) 116.594 bidaiarekin; abenduaren 1a (Gabonetako argiak piztea) 114.565 bidaiarekin; eta urriaren 31 (Gau Beltza) 110.805 bidaiarekin.

Datu horiekin, Dbus herritarrek eta bisitariek gehien aukeratzen duten garraiobide gisa finkatzen da, hiri garraioaren sektorean erreferentziazko enpresa bihurtuta. Horretaz jabetuta, Dbusen 2024 osoan lanean jarraituko dugu donostiarren konfiantza hobetzeko.

 

Irakurri

Aldaketak Dbuseko 13-17-26 lineetan

Puntualtasun arazoak konpontzeko, azaroaren 13tik aurrera, astelehena, aldaketak egingo dira Dbuseko 13-Altza, 17-Gros-Amara-Miramon eta 26-Amara-Martutene lineetan, haien zerbitzu maiztasunak aldatzeko eta, horrela, ibilbidea egiteko denbora gehiago eduki dezaten.

 13- Altza:
13-Altza lineak maiztasuna aldatuko du lanegunetan, 9:00etatik 12:00etara, 14:30etik 16:30era eta 19:30etik 21:00etara, 7-8 minutuko maiztasunez emango baitu zerbitzua.

 17-Gros-Amara-Miramon:
Lanegunetan, 9:00etatik 20:00etara, 17-Gros-Amara-Miramon linearen maiztasuna 12 minutukoa izango da.

26 – Amara-Martutene:
Lanegunetan, 9: 00etatik 20:00etara, linearen maiztasuna aldatuko da, 15 minutukoa izango baita.

 

 

 

EGUNERAKETA: aldaketak Dbusen 5-8-9-14-16-31-42 lineetan

Dbusen zerbitzuen funtzionamendua hobetzeko helburuarekin, urriaren 18tik aurrera, asteazkena, aldaketak egingo dira 5-Benta Berri, 8-Gros-Intxaurrondo, 9-Egia-Intxaurrondo, 14-Bidebieta, 16-Igeldo, 31-Intxaurrondo-Ospitaleak-Altza eta 42-Aldapa-Egia lineetan. 

Aldaketa horiek guztiak ibilbideen eta geltokien aldaketak dira. Maiztasunen aldaketak azaroan egingo dira.

  • 5-Benta Berri:
    Astegunetan 5-Benta Berri lineako zerbitzu guztiak 9:00etatik 20:00etara Zumalakarregi Hiribidean eta Tolosa Hiribidean ibiliko dira, Matia eta R. M. Azkue kaleetan eta Zarautz Hiribidean ibili beharrean. Geltoki hauek kenduko dira: Matia, Benta Berri, R.M. Azkue, R.M. Azkue 32, Zarautz 90 eta Zarautz 122, eta Zumalakarregi 10era, Antiguaoko Anbulatoriora, Majisteritza Tolosa 14ra, Unibertsitatera, Tolosa 112ra eta Tolosa 138ra lekualdatuko dira. 

  • 8-Gros-Intxaurrondo:
    8-Gros-Intxaurrondo lineak Boulevardeko 15ean egingo du azken geldialdia, Boulevardeko 19an egin beharrean.

  • 9-Egia-Intxaurrondo:

    9-Egia-Intxaurrondo lineak Okendo 18an egingo du azken geldialdia, Boulevardeko 15ean egin beharrean. Askatasunaren Hiribideko 6ko geltokia mantentzen da. Horrez gain, Askatasunaren Hiribideko 15eko geltokia Askatasunaren Hiribideko 7ra lekualdatuko da. Okendo 18tik aurrera, Bengoetxea eta Idiakez kaleetan zirkulatuko du, Askatasunaren Hiribidera irteteko.

  • 14-Bidebieta:
    14-Bidebieta lineak, Erdialderantz, Nafarroa Hiribidean ibiliko da Galtzada Nagusian ibili beharrean. Ategorrieta 31ko geltokia Jesuitetara aldatuko da, eta Galtzada Nagusiko geltokia Mariaren Bihotzera aldatuko da.

  • 16-Igeldo:
    16-Igeldo linea dagoeneko aldatu da, eta urrian ere 20 minutuko maiztasuna izango du, ekainetik irailera bitartean ematen den zerbitzu berdina emateko. Datorren urtean, maiztasun hori maiatzean ere aplikatuko da.  Halaber, Okendo 18ko azken geldialdia Boulevardeko 19ra aldatuko da. Okendo 5ean gelditu ondoren, Boulevarderaino joango da (geltokia) eta Hernani eta Miramar kaleetatik jarraituko du Urbieta 6ra.
  • 31-Intxaurrondo-Ospitaleak-Altza
    31-Intxaurrondo-Ospitaleak-Altza lineak Askatasunaren Hiribidea 15ean egingo du geldialdia, Askatasunaren Hiribidea 3an egin beharrean.

  • 42-Aldapa-Egia:
    42- Aldapa- Egia lineak Okendo 18an egingo du azken geldialdia, Boulevardeko 19an egin beharrean. Horrez gain, Askatasunaren Hiribideko 15eko geltokia Askatasunaren Hiribideko 7ra lekualdatuko da. Okendo 18tik aurrera, Bengoetxea eta Idiakez kaleetan zirkulatuko du, Askatasunaren Hiribidera irteteko. Kursaaleko geltokia Colón pasealekura eramango da.