Category : Berriak home

[ITXITA] Lan eskaintza: Erizaina

Osasun laguntza emango die zerbitzu mediora joaten diren langileei, zerbitzu medikoaren jarraibideak betez, zerbitzu medikoari dagozkion administrazio lanak egingo ditu eta material mediko eta farmazeutikoa kudeatuko du, besteak beste.

Eskatzen diren ezaugarri nagusiak: Erizaintzako diplomatura, laneko erizaintzan espezializatua, enpresako erizaintzan 3 urteko esperientzia eta tresna informatikoen ohiko erabiltzailea izatea. Bezeroari (pazienteari) komunikatzeko eta orientatzeko gaitasun handia, besteak beste.

Irargarkia ikusi (pdf)

Irakurri

[ITXITA] Lan eskaintza: Biltegi eta erosketa arduraduna

Biltegiaren eta bertako langileen ardura hartuko du bere gain, bai eta materialen ordezko piezen eta kontsumigarrien erosketen, hornikuntzen, biltegiratzearen eta banaketaren plangintza eta kudeaketa ere, kudeaketa, kostuak, epeak eta prozesuak optimizatuz, bai eta stockaren eta inbentarioaren kontrola ere, besteak beste.

Eskatzen diren ezaugarri nagusiak: Ingeniaritza edo ADE ikasketak, 4 urteko esperientzia erosketak eta biltegiak kudeatzen eta ERP tresnak erabiltzen. Taldeak kudeatzeko trebetasuna, etengabeko hobekuntzarako eta talde lanerako orientazioa eta pertsonen arteko trebetasun oso garatuak, besteak beste.

Irargarkia ikusi (pdf)

Irakurri

Donostia izango da MAN etxearen 12 metroko autobus %100 elektrikoa probatuko duen lehen hiria

Datozen bi asteetan, Dbusek MAN etxearen Lion ‘s City E modeloko 12 metroko autobus %100 elektrikoa probatuko du benetako zerbitzuan, bidaiariekin. Autobusak egunean 250 kilometrotik gora egiteko autonomia du. Donostia da autobus berri hau probatuko duen Estatuko lehen hiria, ondoren beste hiri batzuetan probatuko baita, hala nola Valentzian, Sevillan edo Malagan.

Probak 24-Altza-Gros-Antiguo-Intxaurrondo eta 33-Larratxo-Intxaurrondo-Antiguo-Berio lineetan egingo dira, erabiltzaileekin eta benetako baldintzetan. Ibilbide zorrotza duten auzoarteko bi linea dira, egunero batez beste 240-270 km egiten dituztenak. Ibilgailu honekin orain arte Donostian probatutako autobus elektrikoen autonomia gainditzea espero da.

Autobus berria gauez kargatzen da Kotxetegietan, 3 orduan, 12 metroko beste autobus elektriko batzuekin alderatuta denbora gutxiagoan, eta ez dauka kargatu beharrik ibilbidea egiten ari den bitartean. Bateriek 480 kWh-ko edukiera dute, eta 150 kW-ra arteko karga potentzia. Proiektu pilotu berri honekin, beraz, autobus elektrikoen teknologia honen egungo autonomia muga gainditu nahi da.

Gaur egun, MAN baterien belaunaldi berri batean ari da lanean, zeinak datozen urteetan 400 km-ra arteko autonomia edukitzea ahalbidetuko du, Dbusen operazio betekizunetara egokituta. MAN Lion ‘s City E modeloak ahalbidetuko du egungo bateriak bateria berri horiekin eguneratzea, ibilgailuaren autonomia areagotuta eta zerbitzuan fidagarritasun handiagoa eskainita.

Dbusen probatuko den autobusak flotan sartu diren azken autobus hibridoen estetika bera du, MAN Lion ‘s City (12c) Euro 6d modeloa, DGTren Eco etiketarekin, aurreko beira zabalagoekin eta lineari eta helmugari buruzko informazioa eskaintzen duten autobusaren kanpoaldeko kartel ikusgarriagoekin. Barrualdeari dagokionez, diseinu argia du, eta leku gehiago autobusaren atzealdean, beste lau eserleku gehiagorekin.

Dbusek MAN fabrikatzailearen 31 autobus hibrido ditu. Era berean, elektromugikortasunari dagokionez, azken urteotan Dbusek apustu garrantzitsua egin du teknologia berrietako autobusekin eta hainbat fabrikatzailerekin proiektu pilotuak sartu eta abian jartzearen alde. Flotan 12 metroko hiru autobus %100 elektriko, 12 metroko 50 hibrido eta 12 eta 18 metroko ibilgailu %100 elektrikoak ditu, baita autobus hibrido elektriko bat ere, eta horiekin guztiekin Euskadiko flotarik jasangarrienetako bat da.

Irakurri

Dbus-ek kotxetegien instalazioak handitu ditu kanpoaldean aparkaleku berri bat jarrita

Gaur aurkeztu dute Donostiako Marrutxipi inguruan dauden Dbuseko Kotxetegietan egindako handitze lana. Kanpoaldean egindako aparkaleku berria da. Aparkaleku horretan erraz aparkatu ahal izango dira flotako ibilgailu guztiak, flota etengabe hazten eta berritzen ari baita, Donostiako garraio publikoaren zerbitzura autobus berriak sartzen jarraitu ahal izateko. Aurkezpen ekitaldia instalazioetan egin da, eta bertan parte hartu dute Donostiako alkate Eneko Goiak, Mugikortasun eta Garraioko zinegotzi Pilar Aranak eta Dbuseko zuzendari gerente Igor Gonzalezek.

Eneko Goia alkateak adierazi duenez, “handitze honi esker, autobus-sistema publikoak zerbitzurik onena ematen jarraituko die erabiltzaile guztiei, eta, gainera, konpainia gisa duen bilakaerarekin bat datorren espazio moderno eta praktikoa emango dio”.

Aparkaleku berriak 6.000 m2-ko azalera du, eta 12 eta 18 metroko autobusetarako 26 plaza ditu. Aparkaleku osoa kanpoan dago, eta teilape perimetral bat dauka, barruan estalita ibiltzeko. Horrez gain, zarataren aurkako pantailak eta segurtasun kamerak dauzka eta argiztatuta dago. Ura, elektrizitatea eta airea hartzeko hornidura guneak ere baditu, mantentze lanetarako. Gaur egungo Kotxetegien eraikinaren ondoko orubean dago. Kotxetegi horiek 2003an eraiki ziren eta autobusen belaunaldi berriaren premiei eta flota kudeatzeko behar den guztiari erantzuteko behar diren erraztasun eta baliabide guztiak dituzte. 

Era berean, aparkaleku berria gehituta, Kotxetegien eremurako sarbideak aldatu dira, eta Konpainiako langileentzat beste aparkaleku plaza batzuk gehitu dira. Mons pasealekua eta Fernando Sasiain kalea lotu eta Kotxetegien eraikin nagusia aparkaleku berritik bereizten zuen bidea ere lekuz aldatu da, metro batzuk beherago, Zubiaurrerantz. Horrela, beraz, Kotxetegien eraikina aparkaleku berriarekin konektatuta dago barrutik.

2021ean enpresak 135. urteurrena egiten duen egun berean aurkeztu da instalazioen handitze lanen emaitza, izan ere, enpresa 1886an eratu zen, gaur egun dagoen lekutik metro gutxira, Ategorrietako Kotxetegi zaharretan.  Azken urteotan flota apurka-apurka handitu denez, beharrezkoa izan da Kotxetegietako aparkalekuen lekua handitzea. Gaur egun, Dbusek duen flota ingurumenaren aldetik jasangarrienetariko bat da. 139 autobuseko flota da, tartean direla 12 metroko autobusak eta 18 metroko autobus artikulatuak, eta 12 metroko flotaren erdia, gutxi gorabehera, elektriko-hibridoa da.

Flota moderno, eroso, seguru, irisgarri eta jasangarria eskaintzeko konpromisoan beste urrats bat eginez, Dbus lanean ari da autobus artikulatuak ere berritzeko. Gaur egun 18 metroko 34 autobus dauzka, eta aurreikusita dago urte honen amaierarako 9 autobus artikulatu hibrido berri zerbitzuan jartzea. Autobus artikulatu hibrido horiek Dbusek teknologia horrekin erositako 18 metroko autobusen lehen unitateak izango lirateke.

 

 

Irakurri

Dbus-ek, dibertsitate funtzionala duten pertsonekin eta adineko pertsonekin batera, autobusen ezaugarriak aztertu ditu

Dbus bi egunetan aritu da lanean dibertsitate funtzionala duten pertsonekin eta adineko pertsonekin autobusen ezaugarriak eta funtzionaltasunak aztertzeko. Lan saio horiek Donostiako Udaleko Mugikortasun Sailaren eta Donostia Lagunkoia programaren laguntzarekin egin dira. Programa horrek adinekoen bizi kalitatea hobetzeko eta hiria leku atseginago bat bihurtzeko lan egiten du.

Kotxetegien instalazioetan egindako saioetan, Begiris, Begisare, Elkartu, Gautena eta ONCE elkarteetako kide batzuk eta Donostia Lagunkoiarekin lankidetzan aritzen diren adineko pertsonak batzuk Dbuseko hainbat departamentutako arduradunekin batera aritu dira autobus flotaren ibilgailuen ezaugarriak eta hiri garraioa kolektibo horientzat garraiobide irisgarriago, atseginago eta seguruago bihurtzeko egin daitezkeen hobekuntzak ere  aztertzen.

2009az geroztik, Dbuseko autobus guztiak %100 irisgarriak dira, izan ere, zoru baxua eta arrapala dituzte aulki gurpildunak edo haurren kotxeak dagokien lekura iristeko. Era berean, 2020. urtearen amaieran flotan sartutako azken ibilgailuek hainbat hobekuntza dituzte, hala nola barra guztietan geldialdia eskatzeko sakagailuak eta braillez egindako errotulazioarekin, mugikortasun urriko pertsonentzako eserleku guztiak (eserleku berdeak) autobusaren martxaren noranzkoan kokatuak eta eserleku eredu berri eta ergonomikoago batekin, erdiko aldean haurren kotxeetarako eta aulki gurpildunetarako leku gehiago, sarrera zabalagoarekin eta oztoporik gabe, maniobrak errazago egin ahal izateko, edo kontraste handiagoa kanpoko zein barruko karteletan.

Azken urteetan Dbus bere historiako berrikuntzarik handiena egiten ari da, eta une honetan ibilgailuek 6,7 urte dituzte batez beste. Ildo horretan, aurreikusita dago urte amaieran flotako lehen autobus artikulatu hibridoak zerbitzuan sartzea, eta autobus horiek ere esandako ezaugarriak izango dituzte.

Irakurri

Autobusak zerbitzua ematen ari diren bitartean autobusen barruan dagoen CO2 maila eta aire berriztapena aztertu ditu Dbus-ek

Autobusak zerbitzua ematen ari diren bitartean aire berriztapena eta airearen kalitatea zer-nolakoak diren aztertu du Dbusek, eta berretsi du aireztapena hobetzeko ezarri diren neurriak egokiak direla.

COVID-19ari aurre egiteko ezarritako neurrien barruan, Dbusek autobusetako aire berriztapena eta CO2 kontzentrazioa aztertu ditu, autobusak benetako zerbitzua ematen ari ziren bitartean, hau da, erabiltzaileak autobus barruan zeuden bitartean. Azterketa hori egiteko neurketa ekipo eramangarriak eta flotako ibilgailuetan instalatutako zundak erabili dira, garraio publikoa erabiltzen duten pertsonen eta garraio publikoan lanean ari diren pertsonen segurtasunaren alde lan egiten jarraitzeko.  

Azterketan zerbitzuaren baldintza guztiak hartu dira kontuan, okupazio  mailarik handieneko lineak eta ordu tarteak sartuta, bai eta Dbuseko flotako ibilgailu mota guztien ezaugarriak ere (mikrobusak eta 12 eta 18 metroko autobusak). Azterketa Efinerrek egin du. Efizientzia energetikoan aditua den aholkularitza enpresa bat da eta airearen kalitatea monitorizatzeko hainbat proiektu egin ditu.

Azterketa horretatik ateratzen den ondorioa da Dbuseko autobusetan, okupaziorik handieneko egoeretan, airea 13 segundoan behin berritzen dela, hau da, minutuko 5 aldiz gutxi gorabehera. Tasa hori gomendatzen den aire berritzearen tasa baino 9-10 aldiz handiagoa da.  Geltokietan ateak irekiz eta ibilgailuko leihatilak eta sabai leihoak irekiz lortzen den aireztapenarekin eta ibilgailuaren aireztapen eta klimatizazio sistemekin lortzen da aire berritzearen tasa handi hori.

Airearen kalitateari dagokionez, azterketatik ondorioztatzen da kalitate ona dela. Autobusetako CO2ren kontzentrazioak 640 partekoak baino txikiagoak dira milioiko, okupazio handieneko uneetan. Osasunaren Munduko Erakundeak ezartzen dituen eta aireztapen ez egoki baten erreferentzia moduan hartzen diren muga maximoen oso azpitik. Hiri autobus baten barruko CO2 mailak etxebizitza baten barruan batez beste dauden mailak baino %54 txikiagoak dira, eta bulego batean edo denda batean batez beste dauden kontzentrazioak baino %30 txikiagoak.

Horrenbestez, Donostian egindako neurketen emaitzek berresten dute Dbuseko autobusetan aireztapena egokia dela eta duela hilabete batzuk ezarri ziren neurriek ondo funtzionatzen dutela. Beraz, autobusa garraio segurua da hirian mugitzeko. Aire berritzearen maila eta denbora horrekin, okupaziorik handieneko egoeretan ere erabiltzaileek ez lukete arnastuko beste erabiltzaile batzuen airea. 

Azterketaren emaitza horrekin autobusetako aireztapena hobetzen jarraitu ahal izango da, bai eta efizientzia energetikoa optimizatzera bideratuta ezarri ziren eta pasa den urtetik AENORek COVID-9ari aurre egiteko protokoloetarako duen ziurtagiriarekin eta ISO 50001 arauarekin bermatuta dauden neurriak hobetzen ere.

Autobusetako aireztapena

Dbuseko autobusek etengabeko aireztapena dute zerbitzua ematen ari diren bitartean, geltokietan ibilgailuaren ate guztiak irekiz eta itxiz eta lehen orduan kotxetegietatik ateratzen den unetik ibilgailuaren leiho eta sabai leiho guztiak irekiz airea une oro sartzen baitzaie.  Era berean, lineako ibilbide bakoitzaren azken geltokira iristen den bakoitzean, gidariek leihoek irekita jarraitzen dutela bermatu behar dute, etengabe aireztatzea ahalbidetzeko, eta, ahal den guztietan, geltoki horietan ere ate guztiak irekiko dira.

Gainera, egun osoan ahalik eta gehien aireztatu ahal izateko, erabiltzaileei eskatzen zaie leihoak irekita edukitzeko. Horretarako, informaziorako pegatinak jarri dira leiho guztietan eta informazioa ematen da, audioarekin, autobusen barruko pantailetan Era berean, Dbus ahalegin handia egiten ari da ibilgailuen okupazioa monitorizatzeko, erabiltzaile gehien erregistratzen den irteera orduetan zerbitzua indartzeko.

Bideoa ikusi

Mugi txarteleko diru kargak jada 20 minutura daude erabilgarri Dbusen

Gipuzkoako Garraioaren Lurralde Agintaritzak (GGLA) Mugi txartela web orriaren eta apparen bidez kargatzeko sistema aldatu du, online egiten diren kargak 20 minutura gutxi gorabehera erabilgarri egon daitezen Dbuseko autobusetan. Bidaia gidariaren postuaren ondoan dagoen txartel makinan ordaintzean aktibatzen dira karga horiek.

Orain arte, web orrian edo appean kargak 23:00ak baino lehen egin behar ziren hurrengo egunean autobusetan erabilgarri egon zitezen.

Irakurri

Dbusek bere historiako flotaren berrikuntzarik handienari ekin dio

Dbusek bere flota progresiboki berritzeko zereginean jarraitzen du, 12 metroko 12 autobus hibrido gehituta. Autobusak 10 urterako 3.444.000€-ko mailegu jasangarri bati esker erosi dira, eta Kutxabanken proposamena izan da merkatutik jasotako eskaintzarik onena.

Mailegua gaur sinatu da Donostiako udaletxean, eta ekitaldian parte hartu dute Ogasuneko eta Finantzetako Zinegotzi Jaime Dominguez-Macayak, Dbuseko Zuzendari Gerente Igor Gonzalezek eta Kutxabankeko Banku Instituzionaleko Zuzendari Jaione Lamyk.

Flotaren berrikuntza garrantzitsua

Azken urteetan, Dbusen flotak bere historiako berrikuntzarik handienari ekin dio, ibilgailuen gaur egungo batez besteko adina 6,4 urte izanik. 2014az geroztik, flotari gehitu zaizkion autobus guztiek diesel motorra ez bezalako teknologia dute, eta azken aurrerapen teknologikoak dituzte.  Dbusek 3 autobus %100 elektriko ditu eta 12 metroko 50 autobus hibrido, hau da, gutxi gorabehera, 12 metroko flotaren erdia elektriko-hibridoa da.

Kalkulatzen da autobus berri horiek 10 litro gutxiago kontsumitzen dutela 10 km-ko, baztertuko diren autobusekin alderatuta. Flota berritzeko prozesuak flota osoaren erregai kontsumoa %15 inguru murriztea ahalbidetuko du, eta urtero atmosferara 1.300 tona CO2 igortzea saihestuko du.

Flota moderno, eroso, seguru, irisgarri eta jasangarria eskaintzeko konpromisoan beste urrats bat eginez, Dbus lanean ari da autobus artikulatuak ere berritzeko. Gaur egun 18 metroko 30 autobus dauzka, eta aurreikusita dago autobus unitate artikulatu hibrido berriak erostea, Dbusek teknologia horrekin erositako 18 metroko lehen unitateak izango direnak.

Kutxabanki dagokionez, inbertsio jasangarriak bultzatzeko estrategiaren beste pauso bat da, helburuak izanik ingurumen inpaktu positiboa duten jarduerak egitea, efizientzia energetikoa hobetzea, karbono aztarna murriztea eta ‘ekonomia berdea’ delakoa garatzea.

 

 

Irakurri

Kudeaketa energetikoaren ISO 50001 AENOR ziurtagiria eskuratu du Dbus-ek

Energiaren Kudeaketarako Sistemaren UNE-EN ISO 50001 araua ezarri du Dbusek, baliabide energetikoak modu efizientean erabiltzen utziko dion tresna bat edukitzeko eta horren bidez Konpainiaren energiaren kontsumoa eta igorpen kutsatzaileak murrizteko. AENORek ziurtatu du arau berri horren ezarpena, eta Dbusen jarduera guztietan erabiltzen den energiaren iraunkortasunarekiko eta efizientziarekiko konpromiso etengabearen adierazgarria da.

Arau horren barruan sartzen dira Euskal Autonomia Erkidegoaren Jasangarritasun Energetikoaren Legeak ezartzen dituen helburuak. Legea 2019ko otsailean onartu zen, Eusko Legebiltzarrean, eta euskal administrazio publikoetako eta sektore pribatuko eraikinei, instalazioei eta ibilgailuei aplikatu beharrekoa da.

Ziurtagiri honen entrega ekitaldian parte hartu dute Donostiako Udaleko Mugikortasun eta Garraioko zinegotzi Pilar Aranak, Dbuseko zuzendari gerente Igor Gonzalezek eta Euskadiko AENOR zuzendari Luz Emparanzak.

Arauaren ezaugarriak

ISO 50001 araua nazioarteko araua da, energiaren kudeaketa sistemen gainekoa, eta erakundeen efizientzia energetikoa hobetzea du helburu. Konpainiak garatzen dituen jarduera, operazio edo zerbitzu guztiei aplikatzen zaie, baita Konpainiaren flotari ere, energia modu egokian kudeatzen dela bermatzeko.

Arauaren aplikazioak helburu eta onura hauek aurreikusten ditu:

–  Baliabideak modu efizienteagoan kontsumitzen laguntzen du, baliabideak etengabe monitorizatuz. Kontsumo efiziente horrek, aldi berean, kostuak murriztea dakar.

– Baliabide energetikoen kudeaketako gardentasuna errazten du.

– Energiaren efizientziarako teknologia berrien ezarpena ebaluatzen eta lehenesten laguntzen du.

– CO2 igorpenak eta beste igorpen kutsatzaile batzuk murriztea ahalbidetzen du.

– Energiaren kudeaketan egoki jardutea bultzatzen du.

– Hornidura kate osoan energiaren aldetik efiziente izateko esparrua eskaintzen du.  

– Konpainiak energiari buruzko lege betekizun guztiak betetzen dituela bermatzen du.

Dbus enpresa aitzindaria da kalitate irizpideak lehentasun gisa ezartzen. Euskal Herrian Bidaiaren Garraio Publikoari buruzko UNE-EN 13816 arauaren araberako AENOR ziurtagiria lortu duen lehen garraio enpresa da, eta arau berria ezarrita zerbitzuaren kalitatea ez ezik energiaren kudeaketa ere bermatzen du. Era berean, COVID-19ari aurre egiteko moduaren AENOR ziurtagiria dauka, eta ziurtagiri horrekin bermatzen da Konpainiak egoera berri honi aurre egiteko ezarri diren eta beharrezkoak diren protokoloak eta neurriak betetzen dituela.

 

 

 

 

Irakurri

Dbuseko geltoki berria 19, 31 eta B2 lineetan

Abenduaren 17ik aurrera, osteguna, Dbuseko 19-Aiete-Bera Bera, 31-Intxaurrondo-Ospitaleak-Altza eta B2-Aiete-Bera Bera lineek geltoki berri bat edukiko dute, Lizarra geltokia.

Aieterantz doazela, Larramendi kalean geldialdia egin ondoren, Lizarra kaletik jarraituko dute eta Aldapeta María Ikastetxearen aurrean geldialdia egingo dute, eta beren ibilbidea egiten jarraituko dute Aldapetatik.

Irakurri