Category : Berriak

2022ko Aste Nagusiko Dbusen autobus zerbitzu bereziak (abuztuaren 13tik 20ra)

1. Aste Nagusiko egun guztietan zehar, DBUS-en autobus lineetan zerbitzu bereziak jarriko dira. 

2. Dbus autobusen ibilbide eta geltoki aldaketak, Boulevard trafikorako itxita dagoenean, jai gunea izango baita:

> Ibilbide aldaketen xehetasunak ikusi (pdf)

3. DBUSek gaueko autobus zerbitzu berezia eskainiko du su artifizialak eta gero, 0:50 arte zerbitzuak luzatuz hurrengo geltokietatik:

> Su artifizialen ondorengo zerbitzuak ikusi(pdf)

4. 01:00etatik aurrera, Boulevardetik auzoetara doazen Dbus Gautxoriak ondorengoak izango dira:

> Gautxori zerbitzuak ikusi (pdf)

5. Abuztuaren 14an, igandean, Ama Birjinaren Bezperan, 0:50ak arte auzoetara doazen autobus zerbitzuak gehituko dira. Ondoren gau guztian zehar gautxoriak egongo dira, goizeko lehengo zerbitzuak hasi arte.

Zerbitzuak ikusi (pdf)

6. Abuztuaren 13tik, larunbata, abuztuaren 15era, astelehena, biak barne, zezenketak ikusteko, Ilunbera iristen diren autobus zerbitzuak egongo dira. Ordutegiak eta irteera lekuak ondorengoak izango dira:

> Illunbera doazen zerbitzuak ikusi (pdf)

7. Pasealeku Berrian Aste Nagusiko barraken instalazioa dela eta, abuztuaren 7tik 25era, biak barne, 39-Urgull lineak ez du zerbitzurik emango Urgullera. Abuztuaren 26tik aurrera berriro hasiko da egunero zerbitzua ematen.

8. Antiguon ekitaldi bat dela eta, abuztuaren 17an, asteazkenean, 17:45etik 20:00etara gutxi gorabehera 5-Benta Berri linea ez da Matia kaletik joango. Matia, Benta Berri eta R.M. Azkue geltokiak Zumalakarregi 10era, Anbulatoriora eta Irakasle Eskolara eramango dira.

Informazioa ikusi (pdf)

 

Dbus, aitzindaria emakumeentzako eskaripeko geldialdien sistema bat ezartzen

Dbusek 2019az geroztik eskaintzen du eskaripeko geldialdien sistema bat gautxori linea guztietan, emakumeentzat eta 18 urtetik beherakoentzat. Zerbitzua ostiral, larunbat eta jai bezperetan ematen da, bai eta gaueko zerbitzuak indartzea eskatzen duten ekitaldietan ere. Ibilbideko geltoki ofizialen artean jaistea eskatzeko aukera ematen du, baldin eta geldialdi horiek beharrezko baldintzak betetzen badituzte, segurtasuna hobetzeko asmoz.

Donostia izan zen zerbitzu hori ezarri zuen lehen hirietako bat, 2018an zerbitzua B8-Mirakontxa-Benta Berri-Seminarioa linean ezarrita, eta, hilabete batzuk geroago, gaueko gainerako lineetara zabaldu zuen. Uda honetan, hirian ekitaldiak eta jaiak berriro egiten hasiko direla eta, informazio material berriak argitaratu dira, Dbuseko autobusen erabiltzaileen artean zerbitzu horen erabilera bultzatzeko. Zerbitzua beste hiri batzuetan ere eskaintzen hasi da, eta emakumeen bidai esperientzia hobetzea bilatzen du, emakumeak baitira Donostian autobusetan gehien bidaiatzen duen kolektiboa.

Liburuxka ikusi (pdf)

Anezka zerbitzua dohainik Illunbeko aparkalekutik Erdialdera

OHARRA: abuztuaren 13an, 14an eta 15ean ez da zerbitzurik egongo.

______

Uztailaren 19tik aurrera, asteartea, Donostia San Sebatian Turismoak doako anezka autobusa eskainiko du, Dbusen bitartez, Illunbe aparkalekua eta hiriaren Erdialdea konektatzeko. 

Anezka zerbitzua 20 minututik behin izango da, egunero, uztailaren 19tik abuztuaren 31ra bitartean, abuztuaren 13an, 14an eta 15ean ezik, eta bi geltoki izango ditu:

  • Illunbeko geltokia: Irteerak 11:00etatik 22:20ra, 20 minutuan behin.
  • Mendeurreneko plazako geltokia: irteerak 11:10etik 22:30era, 20 minututik behin.

Illunbeko aparkaleku zein anezka autobusaren zerbitzua doakoak dira.

Donostia Turismoaren, San Sebastian Shopsen – Eusko Jaurlaritzako, Turismo, Merkataritza eta Kontsumo Sailaren bitartez -, Basquetourren eta Donostiako Udaleko Mugikortasun Sailaren eskutik jarri da martxan ekimen hau.

OHARRA: anezka zerbitzuko erabiltzaileei gogorarazten zaie musukoa behar bezala jarrita eramatea beharrezkoa dela autobusera sartzerakoan eta bidaia osoan zehar. 

 

Irakurri

“ Helmuga: uda. Plan bakoitzerako autobus bat”

Beste urte batez, Dbusek zerbitzuen maiztasunak handituko ditu udan, hirian leku batetik bestera modu iraunkorrean ibiltzen laguntzeko. “Helmuga: uda. Plan bakoitzerako autobus bat” kanpainarekin asmoa da donostiarrak eta bisitariak Dbusen mugitzera animatzea, udan Donostiak eskaintzen dituen aukera guztiez ere goza dezaten. Helburu horrekin, udan, ekainaren 23tik abuztuaren 31ra, Dbusek neguko lanegunetan baino 10.000 km gehiago eskainiko ditu zerbitzuan egunean. 

 

 

 

 

 

 

 

 

Kanpaina hiriko sei irudi adierazgarrik osatuko dute, eta markesinetan, autobusetan, Dbusen webgunean eta sare sozialetan egongo da ikusgai datozen hilabeteetan.

Irakurri

Dbusek 12 hiri baino gehiagotako garraio operadoreak bildu ditu donostian

Ekainaren 28 eta 29an Dbusek harrera egin dio Espainiako garraio operadoreen elkarte nagusiaren (ATUC) Material Mugikorraren Batzordeari. Jardunaldi horietan hainbat hiritako 12 garraio operadorek parte hartu dute, hala nola Madril, Bartzelona, Valentzia, Sevilla, Gijon edo Tenerifekoek, bai eta garraio publikoarekin lotura duten enpresa teknologiko batzuek ere.

Jardunaldietan, Dbusen partaidatzea duten hiru proiektu berritzaile aurkeztu dira:

MEDUSA proiektua, autobus elektrikoen birkarga adimenduna, trenbide sare elektrikoan integratzeko.

HIA-BIA proiektua (hiriko autobusetarako birkarga sistema aurreratua): proiektu pilotu honen helburua da Dbusen hiru autobus elektrikoetarako birkarga sistema aurreratu bat baldintza errealetan ezartzea, energiaren kontsumo ezin hobea lortzen laguntzeko, Kotxetegietan dauden kargagailuen instalazioan jardunez eta funtzionalitate berriekin eguneratuz.

Smart Ramp eta Smart Clima proiektuak: autobusen arrapalen funtzionamenduari aplikatutako analisi prediktibo adimenduneko smart proiektuak dira, hedapen automatikoa hobetzeko eta arazo teknikoak saihesteko, bai eta klimatizazio sistema monitorizatzeko, mantentze prediktiboa hobetzeko, alertak ezartzeko, zerbitzuan izandako gorabeherak argitzeko… ere.

Era berean, Batzordean parte hartu duten pertsonek Donostiako autobus flotan ezarritako beste sistema batzuk ezagutu ahal izan dituzte, hala nola jatorria-helmuga matrizea, zeina, autobusen ticketing datuetatik abiatuta, gai den erabiltzaileen desplazamendu ohiturak eraikitzeko algoritmo matematiko bat erabiliz; edo Donostiako flota osoan txertatuta dagoen gidatzen laguntzeko EKObus sistema. Eraginkortasunez gidatzen laguntzeko sistema batez eta anti-bunching sistema batez (autobusek bat ez egiteko sistema) osatuta dago.

Bestalde, bisita teknikoan, Donostiako flota elektrifikatzeko proiektuak ezagutu dituzte, Kotxetegietako azpiegitura elektrikoa berritzea eskatzen dutenak, bai eta Bus Elektriko Adimenduna (BEI) proiektua ere, zeinari esker, Dbusen 17-Gros-Amara-Miramon lineak autobus artikulatu %100 elektrikoekin funtzionatuko duen. 

Bide beretik, tokian bertan ezagutu ahal izan dute Baiona eta Miarritze lotzen dituen Côte Basque-Adourreko Aglomerazioko BRT sistema elektrikoa. Miarritzen eta Baionan egindako bisitan, Batzordeko kideek 2019tik martxan dauden 18 metroko autobus %100 elektrikoak probatu dituzte.

Dbusek bat egiten du Esklerodermiaren Munduko Egunarekin

Bihar, asteazkena, ekainak 29, Esklerodermiaren Munduko Eguna izango da. Dbusek bat egin nahi du Esklerodermiaren Espainiako Elkarteak gaixotasuna gehiago ezagutzeko antolatutako jarduerekin, eta egunero-egunero gaixotasun horren aurka borrokatzen duten pertsonei babesa erakutsi.

Horregatik, bihar Donostiako hiri autobus guztiek kanpainaren kartela eramango dute egun osoan.

Irakurri

Dbus LGTBIQ+ kolektiboaren askapen afektibo-sexualaren Nazioarteko Egunera batzen da

Dbus ekainaren 28an ospatzen den transexualen, bisexualen, lesbianen, gayen eta queeren askapen afektibo-sexualaren aldeko Nazioarteko Egunera batzen da.                                                                                                                                             

Hori dela eta, bihar, ekainaren 28an, Donostiako autobus guztiek, kolore anitzaren bandera eramango dute modu honetan, izango diren ekitaldi guztiei gure babesa emanaz.

Irakurri

Dbusek Volvo markako 12 metroko autobus % 100 elektrikoa probatuko du

Datozen bi asteetan, Dbusek Volvo markako 12 metroko autobus %100 elektrikoa eta zero emisiokoa probatuko du. Autobusa zirkulatzen ari da jada Donostiako kaleetan. Benetako zerbitzua ematen ari da bidaiariekin, eta ziur aski uztailaren 3ra arte emango du zerbitzua, 16-Igeldo linean, larunbat, igande eta jaiegunetan, eta 25-Benta Berri-Añorga linean, lanegunetan.

Azken belaunaldiko Volvo 7900e modeloa da, 470kWh-ko ahalmena duten eta gauean Kotxetegietan kargatzekoak diren bost bateria dituena. Era berean, kamera bidezko atzerako ispilu digitalak ditu, eta besaulkien eta argiztapenaren diseinu berritzailea barruan. Une honetan, modelo horretako 640 unitate baino gehiago daude Europako hainbat hiritan zerbitzua ematen.

Proba hau da Dbusen flota elektrifikatzeko prozesuaren aurreko fasean autobus elektrikoekin egiten ari diren frogetako bat. Izan ere, Next Generation funtsen bidez laguntzak eskatu zaizkio MITMAri (Garraio, Mugikortasun eta Hiri Agenda Ministerioa) 19 autobus %100 elektriko erosteko (4.160.000€-ko dirulaguntza jasoko da) eta Industria, Merkataritza eta Turismo Ministerioari ere beste autobus elektriko bat gehiago erosteko (550.000€-ko dirulaguntza jasoko da), eta dirulaguntza horiei esker egiten ari dira froga horiek.

 

Irakurri

Red.es erakundeak 5G Euskadi proiektuaren erabilera kasuak bisitatu ditu Donostian

Atzo, Ekonomia Gaietako eta Eraldaketa Digitaleko Ministerioaren Red-es erakundea bisitan egon zen Donostia – San Sebastianen, eta 5G Euskadi proiektuaren barruan hirian garatzen ari diren erabilera kasuak ezagutu ahal izan zituen.

5G Euskadi proiektua 19 enpresa eta erakunde publiko eta pribaturen baterako ekimen bat da, hiru parke teknologikoetan benetako 5G sare bat zabaltzeko eta gaitzeko helburuarekin abiarazia, baita 9 erabilera kasu gauzatzeko ere, mugikortasunaren, energiaren, industriaren, zibersegurtasunaren eta Sareko zerbitzuen arloetan produktuak eta zerbitzuak merkaturatu aurretik garatzeko.

Zehazki, Miramongo parke teknologikoan, parke teknologikoa bera hartzen duen eta hiriko ospitaleen eremuraino hedatzen den estaldura eremuaren barruan, gauzatzen ari diren mugikortasuneko 3 kasuak bisitatu dira. Estaldura hau Dbusen bi linearen espazio bat eta esperimentaziorako ekipatu diren eta espazio horretan ere mugituko diren ibilgailuak estaltzeko diseinatuta dago.

Hala, bisitan zehar, Red-es erakundearen ordezkariak  Dbus Donostiako hiriko autobus garraioko enpresaren instalazioetara hurbildu ziren. Izan ere, proiektuaren barruan, enpresak 28-Amara-Ospitaleak lineako autobusetan ezarri du 5G teknologia, linea hori baita Euskadin erabiltzaile gehien erregistratzen duen hiriko autobus linea.  Zehazki, autobus barruan doazen erabiltzaileei eskaintzen zaien wifi konexioa hobetzeko zein autobusetako bideozaintza sistema hobetzeko erabili da teknologia hori. Ordezkaritzak sistema horien funtzionamendua egiaztatu ahal izan du zirkulazioan dagoen autobus batean, 28 linearen ibilbidea eginda, Miramongo Parke Teknologikoraino. Gero, proiektuko gainerako erabilera kasuak ezagutzen jarraitu zuten.

5G Euskadi proiektua saiakuntza banku bikaina da 5G teknologiak bidaiarien entretenimendurako zein publizitatearen zabalkunderako multimediako edukiak kudeatzeko eta banatzeko eskaintzen dituen onurak erakusteko, eta horren xehetasunak ezagutzeko, Dbus bisitatu ondoren Red.es erakundeak Ceiten instalazioak bisitatu zituen.

Pilotuak ematen dituen sare gaitasun berriak ebaluatzeko, Ceiten CCT tresna sorta (Channel Characterization Tool) erabiltzen ari da. Tresna horri esker, Dbusen 28 linearen ibilbideko puntu bakoitzean 5G lotunea karakterizatu ahal izan da. Tresna horrekin, ikusi da, adibidez, Donostiako erdialdean batez beste 200 Mbp-ko banda zabalera lortzen dela jaitsieran, 500 Mbps baino gehiagoko goreneko mailekin.

Vicomtechek, berriz, partzuergoari auto konektatu bat gaitu dio, CAFekin, Ikusirekin eta Ceitekin batera. Bisitariek 5G eta komunikazioen laborategia ikusi ahal izan zuten, baita hainbat sentsore dituen eta 5G konektibitatea ontziratuta duen auto bat ere, zeinak aukera berriak irekitzen dituen mantentze prediktiboko funtzioetarako, operadoreak MECen bidez emandako konputazio zerbitzuetan algoritmiak inplementatuz. Erakustaldi horren inguruan, Ikusik trenetarako duen ekipamendu ontziratua erakutsi zuen, bai eta pilotu honetan garatutako aplikazioa ere. Aplikazioan, batetik, 4G eta 5G teknologiak erabiliz transmititutako datuen latentziak konparatu dira, eta ikusi da 5G teknologiak 10 minutu inguruko latentzia hobea eskaintzen duela, eta, bestetik, prozesatze ahalmenaren gaineko test bat egin da, zeina MECera deskargatu baitaiteke, eta emaitza izan da MECek gutxi gorabehera bikoiztu dezakeela ontziratutako ekipoaren prozesatze ahalmena, baita hirukoiztu ere. Vicomtechek, halaber, MECen hedatutako multimedia edukien banaketa monitorizatzeko duen tresna erakutsi du. Tresnak esperientziaren kalitatea hobetzea ahalbidetzen du, MECek multimedia edukia biltegiratzeko (Edge Caching) eta eduki hori erabiltzaileei banatzeko dituen gaitasunak aprobetxatuz.

Eguna amaitzeko, Pilar Arana Mugikortasun eta Garraio zinegotziak harrera egin zion ordezkaritzari, Donostiako Udaletxean.

Azpimarratu behar da Espainian dagoen 5G pilotu bakarra dela, eta bertan hiru operadorek parte hartzen dutela (Euskaltel Taldea, MASMOVIL eta Orange), soluzioen eta erabilera kasuen gaitzaile teknologiko gisa. ZTE teknologia enpresa, bere aldetik, 5G sareko ekipoak hornitzeaz arduratu da. Multioperadore izaera hori izan da enpresetako ordezkariek balioan jarritako indarguneetako eta bereizgarrietako bat.

5G Euskadi proiektuari buruz

5G Euskadi proiektua 19 enpresa eta erakunde publiko eta pribaturen baterako ekimen bat da, hiru parke teknologikoetan benetako 5G sare bat zabaltzeko eta gaitzeko helburuarekin abiarazia, baita 9 erabilera kasu gauzatzeko ere, mugikortasunaren, energiaren, industriaren, zibersegurtasunaren eta Sareko zerbitzuen arloetan produktuak eta zerbitzuak merkaturatu aurretik garatzeko.

2020an hasi zen proiektua, eta 5G teknologiako proiektu pilotuen bigarren deialdiaren barruan sartzen da. Deialdia Red.es erakundeak sustatu du, 5G Plan Nazionalaren eta Ekonomia Gaietako eta Eraldaketa Digitaleko Ministerioaren Lurralde Adimendunen Plan Nazionalaren barruan. Proiektuak 30 hilabeteko iraupena du eta 7,1 milioi euroko inbertsioa eskatzen du. Inbertsio horretarako, Red.es erakundeak 2,2 milioiko dirulaguntza eman du, Eskualde Garapeneko Europako Funtsaren bidez (EGEF) kofinantzatuta, Espainiako Eskualde anitzeko Programa Operatiboaren kontura (POPE).

Hori garatu ahal izateko, enpresa, berrikuntza zentro eta erakunde publikoen ekosistema bat sortu da, eta proiektu hau baterako erronka bat da horientzat denentzat. Batetik, ABEEko bazkideak: CAF, CEIT-Zentro Teknologikoen Elkartea, Dbus, Datik, Euskaltel, Gestamp Servicios, IKUSI, MASMOVIL, ORANGE, R Cable, Vicomtech eta ZTE. Bestetik, hainbat kolaboratzaile, hala nola Basque Cybersecurity Centre (BCSC), Tecnalia Research&Innovation Fundazioa, Gestamp Bizkaia, Iberdrola, Tecnum, Nafarroako Unibertsitatea edo Euskal Herriko Unibertsitatea.

Eta, gainera, proiektuak laguntza instituzional garrantzitsua du; izan ere, erakunde hauen laguntza ere badu: Red.es eta Estatuko Idazkaritza, Eusko Jaurlaritza, eta Donostiako Udala Donostiaren Sustapenerako Sozietate Publikoaren bitartez, bai eta Euskadiko Parke Teknologikoen Sarea ere.

Informazio gehiago hemen:https://5g-euskadi.com/

 

 

Irakurri

Dbusek bat egiten du Dravet Sindromearen inguruko kontzientziazioa bultzatzeko Nazioarteko Egunarekin

Ekainaren 23an, ostegunean, Dravet Sindromearen Inguruko Kontzientziazioa Bultzatzeko Nazioarteko Eguna ospatzen da.

Dravet Sindromea edo Haurtzaroko Epilepsia Miokloniko Zorrotza 4 eta 12 hilabeteko haurrengan agertzen da lehen aldiz, eta konbultsio kloniko edo toniko-kloniko orokor edo aldebakarrekin lotua dago. Orokorrean iraupen luzekoak dira konbultsioak, sukarrarekin edo gabe. Azken ikerketen arabera, gaixotasun honek 20.000 jaiotzetik 1i eragiten dio.

Dbusek bat egiten du Dravet Sindromea ezagutarazteko eta gaixotasun honen aurka lanean dihardutenei babesa emateko tokiko plataformak egiten dituen ekintzei. Horregatik, bihar Donostiako hiri autobus guztiek Dravet Sindromearen kartela eramango dute egun guztian zehar.

Irakurri