Category : Berriak

Dbus-ek Aenorren kalitate egiaztagiria eskuratu du berriro

Duela gutxi Dbuseko Benta Berri lineak, 5 lineak, berriro eskuratu du AENORek Bidaiarien Garraio Publikoari buruzko UNE-EN 13816 arauaren arabera ematen duen kalitate egiaztagiria.

5 lineak 2009n lortu zuen egiaztagiri hori, 28 Amara-Ospitaleak linea baino bi urte beranduago; ondoren, Altzako lineak, 13 lineak eskuratu zuen 2010ean. Gaur egun hiru lineek indarrean dute egiaztagiri hori bere zerbitzuaren kalitatearen adierazle gisa.

Dbus aintzindaria izan zen UNE-EN 13816 arauak xedatutako kalitate irizpideak lehentasunez ezartzen, bai eta AENORen egiaztagiria lortzen lehen garraio enpresa ere Euskal Herrian. Gaur egun, arauak ezartzen dituen konpromisoak, egiaztagiria dute lineetan ez ezik, autobus flota osoan eta Konpainiaren eguneroko jardunean ere ezartzen dira. Dbusek eskaintzen duen zerbitzuaren kalitatean eta Dbuseko erabiltzaileek egiten duten balorazio onean ikusten da filosofia hori.

Arauak kalitatea azpimarratzen du bereziki erabiltzaileen premien eta itxaropenen ikuspegitik. DBUSek bere gain hartutako konpromisoak Zerbitzuen Gutunean dauden jasota, eta Gutun hori Konpainiaren web orrian dago ikusgai Kalitate Politikarekin batera (www.dbus.es). Honakoak dira alderdirik garrantzitsuenak:

– Eskaintzen den zerbitzuak okupazio mailarik altuenak bermatzen ditu bai eta zebitzua bera bete egingo dela ere.
– Mugikortasun urria duten pertsonen irisgarritasuna.
– Erabiltzaileei informatzeko sistemak, bai geltokietan bai autobusetan, edo web orrian.
– Erregulartasuna bidaiariei eskainitako zerbitzuan.
– Bezeroei egoki erantzutea.
– Erosotasuna ibilgailuetan, garbitasuna barne.
– Segurtasuna ibilbideetan.
– Ingurumeneko eragina murriztua.

Kalitatea bermatzeko moduetako bat da Dbuseko autobusen erabiltzaileei inkestak egitea. Erabiltzaileei 5 linearen gainen egin zaien azken inkestaren arabera, lineak 7,50 puntuazioa lortu du batez beste. Horrek baieztatu egiten du 5 lineako erabiltzaileak oso pozik daudela linearekin.

Inkestan zerbitzuarekin lotutako 23 alderdi baloratu dira gehienez. Baloratutako alderdi guztietan erabiltzaileek 6,15etik gorako puntuazioa eman dute. Honakoak dira erabiltzaileek hoberen baloratutako alderdiak:

– Ordainketa sistemak (7,75)
– Segurtasun sentsazioa (7,67)
– Mugikortasun urriko pertsonentzako sarbideak (7,66)
– Emandako informazioa (7,66)
– Lineaz aldatzeko aukera (7,66)

AENOR egiaztagiriak ziurtatu egiten du goian aipatutako araua betetzen dela, hau da, bidaiarien garraio publikoan diharduen enpresa batek bere zerbitzuaren kalitatearekin lotutako helburuak zehazteko eta helburu horien balorazioa eta jarraipena egin ahal izateko bete beharreko sistematika betetzen duela. Egiaztapen prozesua AENORek egin du, Espainian egiaztatze lanetan lider den erakundeak alegia, kontuan izanda azken hiletako datuak, egindako inkestak eta auditorea erabiltzailetzat agertzen deneko ikuskapenak edo “bezero misteriotsua” izenaz ezagutzen direnak.

Irakurri

Dbus soinu bidezko informazio sistema berriak instalatzen ari da itsuentzat eta ikusmen urria duten pertsonentzat

Dbus soinu bidezko informazio sistema berriak instalatzen ari da bere garraio sarean, itsuen eta ikusmen urria duten pertsonen mugikortasuna hobetzeko asmoarekin. Apustu honekin Dbusek bere zerbitzuen irisgarritasuna eta erosotasuna areagotu nahi du, pertsona guztiek Dbuseko autobusetan arazorik gabe bidaiatu ahal dezaten.

Proiektuaren barruan hiru jarduera garatuko dira:
• Audio sistema bat instalatuko da autobusen barrualdean, hurrengo geltokiaren berri emateko.
• Audio sistema bat instalatuko da autobusen kanpoaldean, autobusa geltokira heltzen denean zer autobus linea den eta norako autobusa den jakinarazteko.
• Audio sistema bat instalatuko da informazio paneletan, linea bakoitzeko autobusa geltokira gutxi gorabehera zer ordutan helduko den jakinarazteko.

Hiru sistemek, autobusen barrualdekoa, autobusen kanpoaldekoa zein informazio paneletakoa, semaforoetako soinu bidezko sistema aktibatzeko erabiltzen den aginte-tresna berarekin funtzionatzen dute. Aginte-tresna hauek ONCEren afiliatuek honen bulegoetan eros ditzakete.

Geltokietako informazio paneletako audio bidezko informazio sistema jada martxan dago Boulevardeko geltokietan zein Askatasunaren hiribidekoetan, eta poliki-poliki gainontzeko paneletara zabalduko da. Aurreikusten da apirilean Erdialdeko geltokietako panel gehienetan egongo dela erabilgarri, eta hemendik hilabete gutxira hiriko geltoki guztietako informazio paneletan.

Autobusen barrualdean, denbora bat da audio sistema martxan dagoela, baina duela gutxi sistema hobetu egin da eta, gaur egun sistema aktibatzeko aurretik gidariari eskatu behar bazaio ere, hemendik aste gutxira esandako aginteaz aktibatzeko moduan egongo da.

Autobusen kanpoaldean, berriz, audio sistema martxan da jada 5 eta 28 lineetan, eta ondorengo hilabeteetan gainontzeko lineetan ezartzen joango da.

Aurreikusita dago 2013ko urrian sistema osoa erabilgarri egotea Dbuseko autobus guztietan, bai eta geltokietako informazio panel guztietan ere.

Itsu eta ikusmen urria duten pertsonentzako informazio sistemaren proiektua SITE proiektuan sartuta dago (Smart Traveling in Atlantic Cities), autobusak erabiltzeko erraztasuna hobetzeko neurrietako bat moduan. Proiektua Eskualdeen Garapenerako Europako Fondoak (FEDER) finantzatuta dago, eta Dbusek Eremu Atlantikoko beste bost hirirekin batera parte hartzen du bertan, garraio publikoa hobetzeko diren sistema teknologikoen ezarpena bultzatzeko asmoarekin.

Argazkia: Ongi Euskadi

Irakurri

DBUS-ek Erantzukizun Sozial Korporatiboari buruzko 2012ko memoria argitaratu du

Dbusek 2012ko ekitaldiari dagokion Erantzukizun Sozial Korporatiboari buruzko Memoria argitaratu du.

2012ko memoria Dbusek urtean zehar bai enpresaren barruan bai kanpoan egin dituen ekintzen laburpen zehatza da. Memoriak alderdi ekonomikoak, sozialak eta ingurumenekoak hartzen ditu bere baitan, eta, besteak beste, eskainitako zerbitzuarekin lotutako alderdiak, egindako jarduketak, autobusen flotari buruzko datuak eta Dbus partaide izan deneko proiektuak zein 2012an egin dituen ezarpen teknologikoak zehazten ditu.

Era berean, bidaiari kopuruak eta garraio titulu desberdinen erabilera aztertzen dira, bai eta Konpainiak izan dituen emaitza ekonomikoak eta Espainian zein nazioartean eskuratu dituen sariak ere. Txostenak, halaber, Konpainiaren eta bere antolamenduaren deskribapen zabala eskaintzen du.

Memoriak azpimarratu egiten du Dbusek alderdi sozial, ekonomiko eta ingurumenekoekin zein bere langileekin hartutako konpromisoaren isla garbia diren kudeaketa etikoa eta garapen iraunkorra, kudeaketan eta zerbitzuaren kalitatean bikaintasuna lortze aldera enpresak egindako apustuaren baitan sartzen direnak.

Dbus ahalegin handia egiten ari da hiria gero eta hobea izan dadin, gero eta bizigarriagoa, gizatiarragoa eta iraunkorragoa. Hiriaren erronka estrategiko horretan, funtsezko zutabea dira autobusa eta garraio publikoa erabiltzen duten pertsona guztiak.

Dokumentua Europar Batasunak definitutako Global Reporting Initiative (GRI) gidaren 3.0 bertsioaren arabera idatzita dago. Dokumentua, formala eta publikoa dena, Dbuseko web orrian dago eskuragarri.

Memoria ikusi

Irakurri

Dbus-ek autobus artikulatu berriak erosiko ditu

Donostiako Tranbia Konpainiak, Dbusek, 18 metroko autobus artikulatu erosteko lehiaketa plazaratu du. Lehenengo momentuan gehienez ere lau autobus artikulatu eskatuko direla. Aitzitik, aurreikusten da Donostiako Tranbia Konpainiak beste unitate batzuk ere eskatu ahal izango dituela, gehienez ere beste hiru, 4 urteko epean asko jota.

Eskaintzen diren autobusen luzera 18 metro inguru izango da, beheko pisu osoa izango dute, eskailera mailarik gabe sarbide guztietan. Gainera, hiru ate izan beharko dituzte, eta mugikortasun urritua duten pertsonentzako guztiz egokituta egongo dira, erdiko atean arrapala barneragarria dutela. Autobusen gutxieneko lekuak 140 bidaiari izango da, eta 2 aulki gurpildunetarako lekua izango da, propio egokitutako gunean.

Autobus berri hauek Donostiako autobus flotan funtzionatzen duten autobus artikulatu zaharrenak ordezkatuko dituztela dago aurrikusita. Gaur egun, Dbusen flotak 120 autobus ditu, 6,56 urteko batez besteko adinarekin, eta % 100 egokituta daude mugikortasun urria duten pertsonentzat.

Autobusik zaharrenak etengabe berritzen dira energetikoki eraginkorragoak diren beste autobus batzuekin ordeztuz, eta horrek nabarmen murriztu ditu Dbusen erregai kontsumoa eta ingurunera egiten dituen CO2 igorpenak; gaur egun, ibilitako kilometro eta biztanle bakoitzeko batez besteko kontsumoa 0,0003 da, hau da, Espainiako txikienetakoa. Halaber, eta etengabeko berritze horren ondorioz, 2008az geroztik, dieselaren 3,5 milioi litro baino gehiago Birziklatutako Olioetatik datorren biodieselarekin ordeztu dira. Horrek esan nahi du urtean eguratsera 10.000 tona inguru CO2 igortzea saihesten dela.

Irakurri

Dbus-ek autobusen eta markesinen kanpoko publizitatearen ustiapena lehiaketara atera du

Donostiako Tranbia Konpainiak, Dbusek, lehiaketara atera du bere autobus flotaren kanpoaldean eta Donostian instalatutako garraio publikoaren markesinetan jarriko duen publizitatearen ustiapena.

Lizitazioa bakoitza bere aldetik doazen bi sortatan banatu da, bereizita esleitzeko, baina, halere, lizitatzaile berari esleitu ahal izango zaizkio biak. Era berean, lizitatzaileak sorta baten zein biren lizitaziora aurkeztu ahal izango dira.

Autobusen kanpoaldeko publizitatearen ustiapenari dagokionez, DTK-k gaur egun dituen autobus guztiena izango da, hau da, 120 autobusena. Zehazki, 9,70 metroko eta 12 metroko 86 autobus, 18 metroko 26 autobus eta 8 mikrobus izango dira.

Markesinetako publizitatearen ustiapenari dagokionez, Donostian 354 markesina eta 225 informazio zutabe daude. Lizitatzailea altzari horien zaintza, kontserbazio eta ordezkatzeaz arduratuko da. Altzarien garbiketa, berriz, DTKren kontura izango da.

Kontratuaren iraupena, sorta guztietarako berdina izango dena, lau urtekoa izango da, kontratua izenpetzen den unetik aurrera. Halere, urtero luzatu ahal izango da, gehienez ere beste bi urte gehiagorako.

Irakurri

28,9 milioi bidaia Dbus-en 2012an

2012. urtean Dbusek Donostiako hiri autobusen 28.964.333 bidaien kopurua lortu zen. Zifra horrek esan nahi du % 0,87ko jaitsiera txikia egon dela aurreko urtearekin alderatuta, baina, dena den, Konpainiak bere historian izan duen hirugarren zifrarik handiena da hiriko bidaiari kopuruari dagokionez, baita tamaina aldetik antzekoak diren gainerako hirietan erregistratzen diren zifrak baino askoz zifra handiagoa ere.

> Informazio osoa ikusi

Irakurri

Dbus-ek % 28 baino gehiago murriztu du bere kontsumo elektrikoa

Argiak graduatzeko eta pizteko sistema adimendun berrien instalazioaren ondorioz, Dbusen elektrizitate kontsumoa % 28 baino gehiago murriztu da azken hilabeteetan. Zehazki, otsaileko kontsumoa azken zortzi urteotako kontsumorik txikiena izan da. Emaitzek erakusten dute energia kontsumitzeko joera beherantz doala nabarmen, Konpainiak erabiltzen ari den aurrezpen eta iraunkortasun politikari esker, bai bere instalazioetan, bai autobusen flotan bertan.

Dbusen instalazioetan azken urteotan sartzen ari diren hobekuntzei esker, Kotxetegien eraikina gero eta eraginkorragoa da energiari dagokionez, energia berriztagarriak erabiltzen direlako, eta orain dela gutxi sistema adimendunak instalatu direlako argiak graduatzeko eta pizteko.

2008an jada 222 panel fotovoltaiko instalatu ziren Dbuseko Kotxetegietan, eta horiek urtero 36.000 kWh inguru sortzen dute. Halaber, gaur egun argiaren kontsumoa murrizteko ekintzak egiten ari dira, bulegoetan zen tailerren inguruan, eta argiak aldatzen ari dira, une bakoitzeko beharren arabera argiaren intentsitatea graduatzeko.

Energiaren aprobetxamendu eraginkorra funtsezko alderdia da ibilgailu berriak erosteko orduan baita ere. 2012an MAN Lion´s City autobus hibridoa erosi izana da horren erakuslea, izan ere, erregaiaren kontsumoa murrizteaz gain, balaztatzearen energia ere berreskuratzen du, eta trakziorako energia bihurtzen. Halaber, duela gutxi ibilgailu bat erosi da, guztiz elektrikoa, berriro kargatzeko bere postuarekin, hirian bertan autobusen mantentze lanak egiteko.

Datozen hilabeteetan, Dbusek urratsak egiten jarraituko du, eraginkortasun energetikoaren eta iraunkortasun gero eta handiagoaren bidean, sartuta dagoen bateko eta besteko proiektuei esker, eta bere flota eta instalazioak progresiboki egokitzeari esker, kontsumoa eta atmosferara egiten diren igorpenak gero eta urriagoak izan daitezen Dbusek 2012. urtean igorpenetan 3.400 tona baino gehiago CO2 gutxiago bota zuela kalkulatzen da.

Irakurri

Martxoak 14, Kutxan eta Euskadiko Kutxan Dbus txarteletako saldoa berreskuratzeko azken eguna

Martxoaren 14a, osteguna, azken eguna izango da Dbus txartelen erabiltzaileek Kutxan eta Euskadiko Kutxan bere Dbus txarteletan duten saldoa berreskuratu ahal izateko. Kutxako txartelen kasuan, eragiketa hori Kutxako kutxazainetan egin ahal izango da zuzenean; Euskadiko Kutxako txartelen kasuan, berriz, bakarrik Euskadiko Kutxako bulegoetan egin ahal izango da, bulegoetako leihatiletan.

 

Gipuzkoako Tarifa Bateratua ezarri eta Lurraldebus eta Mugi txarteletara migratzeko prozesua dela eta, une honetan Dbuseko txartel arrunta guztiak ez dira operatiboak, eta horregatik duela hilabete batzuetatik hona Kutxak eta Euskadiko Kutxak txartel horiek dituztenei txarteletan duten saldoa modu errazean eta azkarrean berreskuratzeko aukera ematen die banku entitateetan bertan.

Era berean, gogorarazten da Dbuseko txartel sozialen erabiltzaileek, salbuespen gisa, oraindik ere beraien txartela erabili ahal izango dutela eta txartelean duten saldoa Dbuseko autobusetan erabili, saldoa agortu arte edo askoz jota irailera arte. Dbuseko hileko bonuaren erabiltzaileek, berriz, bonua erabili ahal izango duten bonuaren indarraldia bukatu arte.

Irakurri

Dbusen autobusetan bidaiatzeko baliagarri diren txartelak

2013ko martxoaren 4tik aurrera, garraio txartel berria behar duten bidaiariek Mugi txartela eskatu beharko dute. Halere, Lurraldebus txartelek ere balioko dute Dbuseko autobusetan bidaiatzeko, orain arte moduan eta Mugi txartelen baldintza berberetan.

Denbora batean, Dbuseko hileko bonuak eta Dbuseko bonobus sozialak baliagarri izaten jarraituko dute Dbusen bidaiatzeko, baina ezin izango dira kargatu. Dbuseko hileko bonuak bere indarraldia agortu arte balioko du, eta bonobus soziala berriz txarteleko saldoa agortu arte, gehienez 2013ko irailaren 3ra arte erabili ahal izango da.

 

Kontsultatu Dbusen bidaiatzeko baliagarri diren txartelen inguruko informazio osoa:

> Informazioa ikusi

Irakurri

Martxoak 3, Dbuseko bonobus arruntak erabiltzeko azken eguna

Martxoaren 4an, astelehenean, Gipuzkoako Tarifa Bateratua indarrean jarriko da; beraz, martxoaren 3a izango da Dbuseko bonobus arruntak Dbuseko autobusetan bidaiatzeko erabili ahal izango diren azken eguna.

Denbora bat da Dbuseko txartel arruntak kargatu ezin direla, baina, martxoaren 4tik aurrera Dbuseko txartel bat ere ezin izango da gehiago kargatu.

2008an Dbusek txartelak aldatzeko prozesua abian jarri zuen bidaia tituluak poliki-poliki egokitzen joan ahal izateko eta, bide batez, Dbuseko erabiltzaileei Gipuzkoako garraiobide publikoen tarifen sistema bateratu berrian sartzen laguntzeko.

DBUSEKO BONOBUS ARRUNTA
Argazkirik gabeko Dbuseko txartel arrunta 2012aren amaieraz geroztik ezin da kargatu, eta Dbuseko txartel arrunta argazkiduna, berriz, otsailera arte kargatu ahal izan da. Txartel biak martxoaren 3ra arte erabil daitezke Dbusen, hain juxtu tarifak bateratu baino egun bat lehenagora arte.

Martxoaren 4tik aurrera, Dbuseko bonobus arruntaren erabiltzaileek Lurraldebus edo Mugi txartel bat eduki beharko dute Dbuseko autobusetan bidaiatu ahal izateko. Horregatik, Lurraldebus edo Mugi Txartelik ez duten Dbuseko bonobus arruntaren erabiltzaile guztiek Mugi txartel berria eskuratu beharko dute Dbuseko autobusetan bidaiatu ahal izateko eta bidaia horietan deskontuak edukitzeko.

Mugi txartel berria eskatzeko, ohiko salmenta guneetara joan beharko dira (baimendutako kiosko, liburu denda eta estankoak) edo eskaera egin Mugiko web orriaren bitartez edo posta bidez.

Eskaera egiteko behar den dokumentazio osoa Dbuseko webgunean dagoen Ohiko Galderak izeneko atalean dator zehaztuta.

Jada Lurraldebuseko txartel arrunta duten erabiltzaileek txartela erabiltzen jarraitu ahal izango dute martxoaren 4an tarifak bateratu ondoren ere tarifa bateratuaren baldintzetan, eta beraz ez dute txartel berririk erosi behar.

DBUSEKO BONOBUS SOZIALA
Dbuseko bonobus sozialaren erabiltzaileek martxoaren 3ra arte, hau da, tarifak bateratuko diren egunaren bezperara arte kargatu ahal izango dute beren txartela. Halere, txartela Dbuseko autobusetan erabili ahal izango dute bere saldoa agortu arte edo gehienez ere 2013ko irailaren 3ra arte.

Beraien bonobus sozialaren saldoa agortu ondoren, Dbuseko bonobus sozialaren erabiltzaileek Lurraldebus edo Mugi txartel berria eduki beharko dute Dbuseko autobusetan bidaiatu ahal izateko. Horregatik, Lurraldebus edo Mugi txartelik eduki ez eta oraindik eskatu ez duten Dbuseko bonobus sozialaren erabiltzaileak Easo 74an dagoen Agintaritzaren bulegora edo Goikoa jauregian, Morlansen eta Altzan dauden Udalinfoetara joan beharko dira martxoaren 1a baino lehen. Ondoren, ohiko salmenta guneetan eskatu ahal izango dute txartela (baimendutako kiosko, liburu denda eta estankoak), edo Mugiko web orriaren bitartez eskaria egin.

DBUSEKO HILEKO BONUA

Dbuseko hileko bonuak martxoaren 3ra arte, hau da, tarifak bateratuko diren egunaren bezperara arte kargatu ahal izango dira. Halere, txartela bonuaren balioa iraungi arte erabili ahal izango da.

Bonua iraungi ondoren, Dbuseko hileko bonuaren erabiltzaileek Lurraldebus edo Mugi txartel bat eduki beharko dute Dbuseko autobusetan bidaiatu ahal izateko. Horregatik, Lurraldebus edo Mugi Txartelik ez duten Dbuseko hileko bonuaren erabiltzaile guztiek Mugi txartel berria eskuratu beharko dute Dbuseko autobusetan bidaiatu ahal izateko eta bidaia horietan deskontuak edukitzeko.

Mugi txartel berria eskatzeko, ohiko salmenta guneetara joan beharko dira (baimendutako kiosko, liburu denda eta estankoak) edo eskaera egin Mugiko web orriaren bitartez edo posta bidez.

Eskaera egiteko behar den dokumentazio osoa Dbuseko webgunean dagoen Ohiko Galderak izeneko atalean dator zehaztuta.

Jada Lurraldebuseko txartel arrunta duten erabiltzaileek txartela erabiltzen jarraitu ahal izango dute martxoaren 4an tarifak bateratu ondoren ere tarifa bateratuaren baldintzetan, eta beraz ez dute txartel berririk erosi behar.

DBUSEKO TXARTELETAN SALDOA SOBRATZEN BADA
Beraien txarteletan saldoa duten Dbuseko txartelen erabiltzaileek diru hori berreskuratu ahal izango dute 2013ko martxoaren 14a baino lehen Kutxara edo Euskadiko Kutxara joanda. Kutxan saldoa zuzenean itzuliko zaie kutxazain automatikoen bitartez, txartela baliogabetzen den unean. Euskadiko Kutxan, berriz, leihatiletan egin beharko da izapide hori.

Irakurri