Category : Next funtsak

Helmugako geltoki jakin batzuk beteta daudenean erabili ahal izango da funtzionalitate berri hori.

Dbizik, Donostiako bizikleta sistema publikoak, Geltoki+ abian jarriko du. Dbizi sistemaren funtzionalitate berri bat da, eta bere helburua da herritarrei kalitatezko zerbitzua eta beraien beharretara egokitutakoa ematen jarraitzea. Funtzionalitatea apirilaren 2tik aurrera egongo da erabilgarri.

Hala, Dbizik aparkaleku gehiago eskainiko ditu bere 11 geltoki periferikoenetan, giltzarrapo adimenduneko sistema baten bidez. Giltzarrapo adimendunen sistema hori geltokiak beteta daudenean erabili ahal izango da.

Gaur goizean aurkeztu da sistema, eta, bertan, Mugikortasuneko eta Garraio Jasangarriko zinegotzi Olatz Yarzak hau nabarmendu du: “Dbizi sistema gaur egun herritarrek asko baloratzen eta erabiltzen duten zerbitzua da, eta, beraz, Geltoki+ funtzionalitatea ezarri nahi izan dugu, erabiltzaileen harrera on horri erantzuteko”. Horrez gain, hau ere esan du: “Etengabe ari gara lanean hobekuntzak bilatzen, bizikleta hiritik ibiltzeko lehentasunezko garraio gisa erabiltzea bultzatzen jarraitzeko”.

Geltoki+

Bizikleta elektrikoen atzeko gurpilean giltzarrapo adimendun bat jartzea izango da, berez, Dbiziren funtzionalitate berri hau ahalbidetuko duen sistema (bizikleta mekanikoetan ez da eskuragarri egongo). Izan ere, sistema horri esker, bizikletak aparkatzeko berariaz definitutako lekuetan aparkatu ahal izango da. Leku berezi horiek Dbiziko geltoki jakin batzuen inguruan kokatuta egongo dira, eta Dbiziko geltoki horietako aparkaleku guztiak beteta daudenean baino ezingo dira erabili.

Geltoki horiek Geltoki+ izenez ezagutzen dira, eta hiriaren erdigunetik urrunen dauden eta/edo hiriaren goialdeetan dauden auzoetako batzuetan egongo dira, auzo horietan Dbiziko geltokien arteko distantzia handiagoa baita. Horrela, beste aukera bat eskaintzen zaie helmugako geltokia beteta aurkitu eta hurbilen duten beste geltokia urrun samar geratzen zaienei.

Geltoki horietan arkua duten aparkalekuak jarriko dira bizikletetarako, eta aparkaleku horiek lokailu batzuk izango dituzte bizikletaren giltzarrapora lotzeko. Bizikleten aparkaleku horiek erraz identifikatu ahal izango dira, izan ere, kolore berdez margotuta daude, aparkaleku arruntetatik bereizteko.

Aparkatzeko prozesua

Bizikleta bat Geltoki+ batean aparkatzeko prozesua oso erraza eta intuitiboa da. Dbiziren appak Geltoki+ funtzioa aktibatuko du erabiltzailea Dbiziko geltoki horietako batera hurbiltzen denean, eta hura beteta dagoenean. Erabiltzailea Geltoki+ geltokira hurbildu beharko da, eta bizikletaren giltzarrapoa aparkalekuko arkuaren kableari lotu. Giltzarrapoa behar bezala itxita dagoenean, bidaia behar bezala amaitu dela jakinaraziko du aplikazioak.

Bizikleta Geltoki+ geltokietatik kanpo aparkatzen saiatuz gero (kalean, zerbitzu hori ez duten geltokietan), edo horietan aparkalekuak libre badaude, giltzarrapoa itxi egingo da, eta Dbiziren appak leku horretan aparkatzerik ez dagoela jakinaraziko du; beraz, erabiltzaileak 2 minutu izango ditu bizikleta desblokeatzeko eta baimenduta dagoen leku batean aparkatzeko. Erabiltzaileak jarraibideei jarraitzen ez badie, sistemak bizikleta blokeatuko du, baita erabiltzailearen kontua ere.

Erabiltzaileei laguntza handiagoa emateko, Dbizik bideo batzuk argitaratuko ditu bere web orrian (www.dbizi.eus), funtzionalitate berri hori azaltzeko.  Era berean, abonatu guztiek mezu elektroniko bat jasoko dute, sistema berriari buruzko informazio zehatzarekin.

Geltoki+ batean aparkatu ahal izateko bizikleta elektrikoek ezinbestez behar duten giltzarrapoa martxoan hasi da jartzen, eta jada 125 bizikletak dute instalatuta giltzarrapo hori. Aurreikusita dago ekainerako bizikleta elektriko guztiek aukera berri hori izango dutela.

Giltzarrapo adimendun berri horiek Garraio eta Mugikortasun Jasangarriko Ministerioaren (MITMA) Next GenerationEU funtsen bidez finantzatu dira.

Geltoki+ berrien kokalekuak

Geltoki+ berriak geltoki hauetan egongo dira, eta, geltokiaren arabera, giltzarrapoa duten 6-12 bizikleta elektriko aparkatzen utziko dute:

– Añorga+: 4 arku izango ditu, eta gehienez 8 bizikleta aparkatu ahal izango dira.

– Buenavista+: 5 arku izango ditu, eta gehienez 10 bizikleta aparkatu ahal izango dira.

– Herrera+: 5 arku izango ditu, eta gehienez 10 bizikleta aparkatu ahal izango dira.

– Zubiaurre+: 5 arku izango ditu, eta gehienez 10 bizikleta aparkatu ahal izango dira.

– Nornahi+: 3 arku izango ditu, eta gehienez 6 bizikleta aparkatu ahal izango dira.

– Atarizar+: 3 arku izango ditu, eta gehienez 6 bizikleta aparkatu ahal izango dira.

– Munto+: 6 arku izango ditu, eta gehienez 12 bizikleta aparkatu ahal izango dira.

– Andoain+: 5 arku izango ditu, eta gehienez 10 bizikleta aparkatu ahal izango dira.

– Tranbia+: 3 arku izango ditu, eta gehienez 6 bizikleta aparkatu ahal izango dira.

– Urbia+: 5 arku izango ditu, eta gehienez 10 bizikleta aparkatu ahal izango dira.

– Bartzelona hiribidea+: 5 arku izango ditu, eta gehienez 10 bizikleta aparkatu ahal izango dira.

Dbusek MAN Truck & Busen Turkia, Alemania eta Espainiako ordezkaritzetako talde baten bisita jaso du. Autobus elektrikoen produktu eta garapeneko ingeniariek osatzen zuten taldea. Lan jardunaldi horiek Kotxetegietan egiten ari den elektrifikazio prozesuaren barruan egin dira.

Datozen 12 hilabeteak funtsezkoak dira autobus flota deskarbonizatzeko trantsizioan, denbora tarte horretan Dbusek aurreikusten baitu beste 43 autobus erabat elektriko gehiago jasotzea. Horrela, flotaren %33 autobus %100 elektrikoak izango dira 2025eko lehen hiruhilekoan. Autobus horien guztien erosketa MAN Truck & Bus Iberiari esleitu zaio, eta Next Generation funtsen bidez finantzatuko dira, Garraio, Mugikortasun eta Hiri Agendako Ministerioaren (MITMA) dirulaguntzari esker.

Hori dela eta, Dbusen eta MAN Truck & Busen arteko topaketarako jardunaldi hauek antolatu dira, garatzen ari diren lanen berri emateko elkarri, eta Dbusen elektrifikaziorako egingo den eraldaketan inplikatutako alde guztien arteko sinergiak ezartzeko.

Jardunaldiak oso aberasgarriak izan dira, eta gai batzuetan sakontzeko aukera eman dute, esaterako, autobus elektrikoen garapenean, gure instalazioen kargako azpiegitura elektrikoetan, karga puntuen eta kudeaketa softwarearen arteko komunikazio protokoloetan; azken batean, Dbusi zerbitzuaren benetako egoeraren kontrola izatea eta arazoen konponbidean aurrea hartzea ahalbidetuko dioten soluzioetan sakondu ahal izan dute.

Bilera horietan, gainera, Dbusek bere segurtasun plan berria aurkeztu du. Plan horretan jasotzen dira elektrifikazioaren ondorioz aurre egin beharreko erronka berriak, besteak beste, suteen aurkako plana eta atoian eramateko probak.

Elektrifikazio lanak

 Joan den urtarrilaren 22an hasi ziren kotxetegietako instalazioen azpiegitura elektrikoa berritzeko lanak. Obra honen helburua da linea elektriko baten trazadura egitea, Egiako banaketako azpiestazio transformatzailetik Kotxetegien ingurura, gutxi gorabehera 1,5 kilometroko trazadura, non sekzionamendu zentro bat egongo den, eta zentro horretatik, zuzeneko hornidura elektrikoaren banaketa hasiko da, transformazio zentroetatik igarota. Gaur egun, trazaduraren %35 eginda dago; beraz, obra gauzatzeko aurreikusitako epeak betetzen ari dira, maiatzaren amaierarako bukatzea espero baita.

Kotxetegien instalazioen barruan, berriz, aparkalekuko 119 plazetako hartunea egokitzen ari da, horri esker autobus elektriko berriak gehitu ahal izango dira-eta.

EDS INGENIERÍA Y MONTAJES SAUk eta ALTUNA Y URIA SAk osatutako ABEEa arduratuko da Egiako banaketako transformazio azpiestaziotik Kotxetegien inguruetaraino linea elektriko baten trazadurari ekiteaz.

Gaur astehelena, urtarrilak 22, Kotxetegietako instalazioen azpiegitura elektrikoa eraldatu eta autobus %100 elektriko gehiago sartzen utziko duten obrak hasi dira.

Dbus eraldatu eta zero emisioko flota bihurtzeko, ezinbestekoa da instalazioetako azpiegitura elektrikoa eraldatzea. Gaur egun, flotako 4 autobus %100 elektrikoekin kotxetegietako hartune elektrikoak duen ahalmen guzti-guztia erabiltzen da. Horregatik, beharrezkoa da linea elektriko baten trazadurari ekitea Egiako banaketako transformazio azpiestaziotik Kotxetegien inguruetaraino, 1,5 kilometro inguruko distantzian, non sekzionamendu zentro bat egongo den. Sekzionamendu zentrotik zuzeneko hornidura elektrikoa banatzen hasiko da, transformazio zentroetatik igaroz.

Eraginak

Obrak 4 hilabete inguruko iraupena izango du, eta bizilagunei ahalik eta gutxien eragiteko, lanak egingo dituen enpresa esleipendunak, EDS INGENIERÍA Y MONTAJES SAUk eta ALTUNA Y URIA SAk osatutako ABEEak, obra zatika egitea proiektatu du, zati bakoitzaren iraupena gehienez 5 egunekoa izanik

Gune hauek eragingo ditu obrak: Alkolea pasabidea, Egia kalea, Aldapa kalea, Tolaregoia kalea, Gabriel Aresti pasealekua, Ametzagaña kalea, Polloe plaza, Sibilia kalea, eta Fernando Sasiain.

Obra gaur hasi da, Txurkoene kalean, 11 eta 19 zenbakien artean. Horretarako, obra zuzendaritzak jakinarazi du lanak egiten diren egunetan, gutxi gorabehera aparkaleku batzuetan eta alboko espaloian nabarituko dela lanen eragina. Galtzada eta etxebizitzetarako sarbidea, berriz, erabat libre geratuko dira.

Urtarrilaren 29ko astean, Txurkoene kaleko beste zatia egingo da, hau da, 1 eta 11 zenbakien arteko zatia. Lehen zatian bezala, obrek aparkalekuei eta alboko espaloiari eragingo diete. Galtzadari eta etxebizitzetarako sarbideari ez diete batere eragingo.

Obrek aurrera egin ahala, eta kaltetutako guneetara hurbildu ahala, gutun bat bidaliko zaie auzokoei, obren iraupena eta eraginak jakinarazteko, Txurkoene kaleko bizilagunekin egin den bezala. Gainera, auzokideren batek zalantzaren bat izanez gero edo informazio gehiago nahi izanez gero, enpresa eleipendunak harremanetarako telefono bat emango du jakinarazpen horretan.

Flotaren elektrifikazioa

Kotxetegiak elektrifikatzeko prozesuaren lehen fase honetan, kargatzeko hartune guztiak egingo dira, guztira dauden 119 aparkaleku plazetaraino. Horrez gain, kargatzeko 32 puntu, 60 pantografo alderantzikatu eta horiei dagokien euskarri egitura metalikoa gehituko dira. Instalazioak elektrifikatzeko lan horiei esker, beste autobus elektriko gehiago sartu ahal izango dira, eta, horrela, urte batzuen buruan, Dbusen azpiegitura elektriko berria erabat martxan dagoenean, Dbusek 8,5MW-ko karga ahalmena edukiko du, eta, beraz, Gipuzkoan potentzia gehien kontratatuta duen erakundeetako bat izango da. Aurten bertan hasiko da autobus %100 elektriko gehiago sartzen, instalazioen elektrifikazio lanak amaitu ondoren. Zehazki, 2024an 12 metroko 23 autobus %100 elektriko eta 18 metroko sei autobus elektriko (artikulatuak) jasotzea aurreikusten da.

Berrikuntza horri esker, kalkulatzen da urtean 960.000 litro gasolio gutxiago kontsumituko direla eta 2.600 tona CO2 gutxiago igorriko direla.

Next Generation funtsen finantzaketa

Obra hau eta lehen 30 autobusen erosketa Next Generation funtsek finantzatuta egingo dira. Autobus horietatik, 12 metroko autobus batek Industria, Merkataritza eta Turismo Ministerioaren Helmugetako Jasangarritasun Turistikoko planaren ezohiko deialdiaren bidez dirulaguntzak jaso ditu, eta gainerako ibilgailuak Garraio, Mugikortasun eta Hiri Agenda Ministerioaren (MITMA) dirulaguntzarekin erosiko dira. Lizitazio horien ondoriozko inbertsioa 23.456.613,82 €-koa da, eta Next Generation Europako funtsen bi deialdien dirulaguntza osoa 10.056.492 €-koa da.

Dagoeneko erabilgarri dago Dbusen autobusetan bidaia txartela QR kodearekin ordaintzeko aukera. Sistema berritzaile hori Dbusen linea guztietan erabil daiteke, eta txartela ordaintzeko beste aukera bat da, eskudirutan ordaindu ordez, Donostian autobusez bidaiatzea errazago eta erosoago eginda.

Lau garraio titulu berri

Zehazki, Dbusek QR kodearekin ordaintzeko lau modu berri sortu ditu. Dbusen app ofizialaren bidez eros daitezke ordainketa modu horiek, eta appa iOS eta Androiderako eskuragarri dago. Neurri hori abian jartzeko, apparen bertsio berri bat ere kaleratu da, eta bertsio horretan “Tickets” izeneko atal berri bat dago.

Hauek dira lau garraio titulu berriak:

• 30 minutuko QR txartela, egunekoa: eguneko nahi beste zerbitzutan erabil daiteke, erosi eta hurrengo 30 minutuetan. Transbordoak egiten uzten du. Prezioa 1,85€ da.
• 30 minutuko QR txartela, gauekoa: aurreko kasuan bezala, garraio titulu hau  erosleak gaueko nahi beste zerbitzutan erabil dezake, erosi eta hurrengo 30 minutuetan. Prezioa 2,50€ da, eta transbordoak egiten ere uzten du.
• 24 orduko QR txartela: Dbuseko autobusetan mugarik gabe bidaiatzeko aukera ematen du 24 orduz, bai eguneko zerbitzuetan, bai gaueko zerbitzuetan, eta  6 €-ko prezioa dauka.
• 48 orduko QR txartela: Dbuseko autobusetan mugarik gabe bidaiatzeko aukera ematen du 48 orduz, eguneko eta gaueko zerbitzuetan ere bai. Prezioa 10€ da.

Kreditu edo zordunketa txartel baten bidez erosten da, txartelaren datuak appean sartuz. Sartutako datuak appean gorde daitezke, aurrerago egiten diren erosketetan erabiltzeko. Erosketa sistema segurua da, eta ordainketa Redsys ordainketa pasabidearen bidez egiten da. Txartela appean erostean, QR kode dinamiko bat sortzen da, eta, autobusera igotzean, gidariaren postuaren ondoan dagoen makinan baliozkotzen da, mugikorraren pantaila gora begira jarriz kodea eskaneatu ahal izateko (ikus irudia). Txartel bat baino gehiago eros daiteke aldi berean, eta eragiketan erosten diren txartelak adina QR kode sortuko dira, autobusean banan-banan baliozkotzeko. Erosketa egiten den uneak markatuko du txartelaren iraungitze unea, erosketa egin eta hurrengo 30 minutuetan, edo 24 edo 48 ordutan erabili beharko da-eta, txartelaren modalitatearen arabera.

Sistemarekin, bidai txartelak erostea erraztu egiten da eta ordainketa arinago egiten da autobusean sartzean, geldialdi bakoitzaren denbora gutxiago eginda eta bidaietan emandako denbora murriztea ahalbidetuta. Txartela EMV kontakturik gabeko banku txartelarekin ordaintzeko modalitatearen osagarria da, zeinak 2017az geroztik funtzionatzen baitu Dbusen autobusetan, eta MUGI txartelarekin ordaintzeko modalitatearena ere bai. Txartel berriak oso praktikoak eta baliagarriak izan daitezke, bisitarientzat eta turistentzat ez ezik, une jakin batean MUGI txartela ez daramaten edo saldorik gabe geratu eta eskudirua ez duten ohiko erabiltzaileentzat ere. QR ordainketa sistemari esker, segundo gutxi batzuetan eros dezakete QR txartela geltokian edo autobusean bertan daudenean.

Era berean, aurreikusita dago datozen hilabeteetan autobusek aurrealdean ezkerrean eta erdiko atean dituzten baliozkotzeko makinak berritzea, txartel berri horiek autobuseko makina guztietan baliozkotu ahal izateko makina berri horiek gidariaren postuaren ondoan dauden makinek dituzten funtzionalitate berberak izango baitituzte, hala nola QR kodearekin, banku txartelarekin eta Bat eta Barik txartelekin zein MUGI txartel mota guztiekin ordaintzeko aukerak. 

QR kodearekin ordaintzeko modua Europako E-MOBASK proiektuari eta Next Generation funtsei esker inplementatu da. Zehazki, E-MOBASKek eguneko eta gaueko 30 minutuko QR txartelen garapena finantzatu du, eta 24 orduko eta 48 orduko QR txartelen garapena, berriz, Garraio, Mugikortasun eta Hiri Agendaren Ministerioaren bidez (MITMA) lortutako Next Generation funtsei esker egin da.

Dbusek Donostiako Illunbeko aparkalekuaren eta Erdialdearen artean eskaintzen duen anezka zerbitzua 12 metroko autobus %100 elektriko batekin egingo da datozen egunetan. MAN Lions City 12e modelokoa da, eta Industria, Merkataritza eta Turismo Ministerioaren Helmugetako Jasangarritasun Turistikoaren ezohiko deialdiaren barruan erosi da, Next Generation Europako funtsek finantzatuta.

MAN TRUCK & BUS IBERIA, SAU enpresari egindako erosketaren barruan zerbitzuan jartzen den lehen autobusa da, enpresa horrek irabazi baitzuen lizitazioa, eta, erosketa horrekin, Donostiako autobus lineetan 12 metroko beste 13 autobus %100 elektriko eta 18 metroko sei autobus %100 elektriko sartzea ahalbidetuko da. 12 metroko autobus berri honen eta bere karga-estazioaren prezioa 560.500 euro + BEZa da, eta bost urteko bermea du. Halaber, baterien bermea 12 urtekoa da, eta horrekin ibilgailuen bizitza erabilgarria estaltzen da. Europako funtsetatik jasotako dirulaguntza 550.000€-koa da.

Illunbeko doako aparkalekuaren eta Erdialdearen arteko anezka zerbitzua Dbusek eta Donostiako Udalak sustatzen dute, Mugikortasun Departamentuaren bidez, garraio publikoa bultzatzeko eta, horrela, hiriaren erdialdean kotxe partikular gutxiago ibil daitezen eta erosoago eta jasangarriago bidaiatzeko. Anezka zerbitzua 20 minutuko maiztasuna du, 11:00etatik 22:30era, asteko egun guztietan, eta bi geltoki ditu. Azken urteetan, zerbitzua urteko bi garaitan eskaini da, Gabonetan eta udan, eta herritarrek ondo hartu dute zerbitzua.

Abuztuaren 31n, uztailaren 8an martxan jarri zen anezka zerbitzua 34.552 bidaiarik erabili dute, eta aurreko udan, berriz, 23.401 bidaiarik. 11.151 bidaiariko igoera horrek %47,65ko igoera dakar anezkaren erabileran, eta abuztuaren 7tik 22ra bitartean erregistratu da zerbitzu horren eskaririk handiena. Izan ere, bidaiarien zifra errekorra abuztuaren 10ean lortu zen, 1.734 bidaiarirekin, hau da, zerbitzuaren batezbesteko bidaiari kopuruaren oso gainetik, 751 bidaiarikoa baita.

Ibilgailu berri horrekin, hirian sartzen diren ibilgailu pribatuen kopurua murrizteaz gain, zerbitzu jasangarria eskainiko da, Konpainiak autobus flota pixkanaka elektrifikatzen aurrera egiteko duen helburuarekin bat eginda. Irailaren 10ean anezka zerbitzua amaitu ondoren, autobusak zerbitzua eskaintzen jarraituko du Dbusen gainerako lineetan, etorkizunean anezka zerbitzua berriro aktibatu arte. 

Dbizi Donostiako bizikleta alokairu sistemak beste 21 geltoki gehiago ditu dagoeneko, eta beste auzo batzuetara iritsi da, esaterako, Altzara, Bidebietara edo Añorgara. Datozen hilabeteetan, gainera, beste bi geltoki gehituko dira, izan ere, obra batzuk direla-eta bi geltoki horiek ezin dira orain jarri. Gaur aurkeztu da, ekitaldi batean, sistema beste 257 bizikleta elektriko gehiagorekin zabalduta, eta aurkezpen ekitaldian parte hartu dute Eneko Goia Donostiako alkateak eta Igor Gonzalez Dbuseko zuzendari gerenteak.

Sistema horrela zabalduta, Dbizi orain arte zerbitzurik ez zuten Donostiako guneetara iritsi da; izan ere, guztira 70 geltoki ditu, denak mistoak, eta zerbitzuak 317 bizikleta elektriko eta 317 bizikleta mekaniko ditu kalean. Horrela, hirian estaldura handiagoa eta bizikleta elektriko gehiago eskaintzen ditu, erabiltzaileen eskari handiari erantzuteko. 

Dbizi sistema donostiarren egunerokoaren parte dira dagoeneko. Sistema auzoetara zabaltzeak eskatzen du, halaber, sarea ere Erdialdea-Amara-Antigua-Gros-Egia aldeetan zabaltzea, auzoen artean gertatzen diren joan-etorriei erantzun ahal izateko eta erdialdetik gertuen dauden eremuetako geltokietan ainguraleku libreak egon daitezen

Horregatik, eremu horietan geltoki berriak instalatzeaz gain, lehendik dauden geltoki batzuetan ainguraleku gehiago jarriko dira. Zabaltze horrek, gainera, mugikortasun jasangarria sustatzen laguntzen du gure hirian, garraio publikoaren intermodalitatea indartuz.

Mugarri berri hau ezagutarazteko, komunikazio kanpaina bat jarri da abian, sistemaren zabaltze honen hiru ardatz nagusien inguruan: auzo gehiago, geltoki gehiago eta bizikleta gehiago, hori guztia “Dbizi gehiago bizi” lelopean.

Dbiziren geltoki berrien kokalekua

EKIALDEA

• Bidebieta (2)

– Geltoki 1 Julio Urkixo 44an.

– Geltoki 1 Nornahi plazatxoan (Bidebietako bidegorriaren lanak amaitu ondoren)

• Altza (5)

– Geltoki 1 Harrobieta plazatxoan

– Geltoki 1 San Martzial plazan, Altzako goialdean (alde zaharra)

– Geltoki 1 Altzako kiroldegian

– Geltoki 1 Buenavistan (biribilgunea)

– Geltoki 1 Larratxo pasealekua 24an

• Intxaurrondo (1)

– Geltoki 1 Txaparrene pasealekua 26an (Zubiaurre)

MENDEBALDEA

• Antigua- Ibaeta (5)

– Geltoki 1 Satrustegi hiribidea 1ean (Matia kaleko sarreraren ondoan)

– Geltoki 1 Erregezaintza 28an

– Geltoki 1 Pio Baroja 20an

– Geltoki 1 Sert plazan

– Geltoki 1 Berio 42an (goialdea)

• Aiete (3)

– Geltoki 1 Bera-Beran

– Geltoki 1 Pagola-Lugaritzen

– Geltoki 1 Txapillo kalean

Añorga (1)

– Geltoki 1 Añorga Txikin (sarrerako biribilgunea)

ERDIALDEA-AMARA-GROS- EGIA

• Erdialdea (2)

– Geltoki 1 Moraza 1ean

– Geltoki 1 Nautikoan (Udaletxeko lanak amaitzen direnean).

– Ainguraleku kopurua handitzea: 12 ainguraleku gehiago lehendik dauden geltokietan

• Amara (1)

– Geltoki 1 Olaeta/Ferreriasen

– Ainguraleku kopurua handitzea: 8 ainguraleku gehiago lehendik dauden geltokietan

• Gros-Egia (3)

– Geltoki 1 Zabaleta 35ean

– Geltoki 1 Ametzagaina 47an (Egiako goialdea)

– Geltoki 1 Zuhaizti plazan

Zerbitzuaren zabaltze horren zati bat, zehazki gehituko diren 132 bizikletak, Garraio, Mugikortasun eta Hiri Agendako Ministerioaren (MITMA) Next Generation Funtsen bidez finantzatu dira.

Dbusek bi furgoneta %100 elektriko erosi ditu Konpainiako langileen joan-etorrietarako. Mercedes-Benzek egiten dituen eVITO Furgon eta bidaiarientzako eVITO Tourer modelo berrietako bi furgoneta dira, eta horiekin tailerretako langileek eta trafikokoek, hurrenez hurren, eguneroko zereginetarako egin behar dituzten joan-etorriak egin ahal izango dira.

Furgoneta bien lizitazioa GOIKO-AUTO XXI, SLri esleitu zaio. Lizitazioaren prezioa 51.252 € + BEZa da eVITO Tourer furgonetaren kasuan eta 38.000 €+ BEZa eVITO Furgon modeloaren kasuan. Era berean, Energiaren Euskal Erakundetik (EEE) 8.000 €-ko dirulaguntza jaso da ibilgailu biak erosteko. Dirulaguntza Mugikortasun Eraginkorra eta Jasangarria sustatzeko Pizgarrien Programaren (MOVES III programa) barruan eman da, Europako Suspertze, Eraldatze eta Erresilientzia Planaren esparruan (Next Generation funtsak).

Bi furgoneta berriak dagoeneko zerbitzua ematen ari dira, eta bi furgoneta zahar ordezkatzen dituzte. Beraz, furgoneta horiekin Dbusek laguntzarako duen ibilgailu flota modernizatu ahal izan du, ingurumenaren aldetik jasangarriagoak diren furgoneta gehiago ditu-eta. Furgonetek duten bateria kotxetegietan kargatzen da, gutxi gorabehera 6 ordutan, eta 149-190 km inguruko autonomia du, eta gutxi gorabehera 251-197 Wh/km-ko kontsumoa.

Flota berritzeko erositako furgoneta %100 elektriko horiek, gainera, Dbuseko flotaren elektrifikazio progresiboaren parte dira, zeinarekin egunetik egunera zerbitzu eraginkorragoa eta jasangarriagoa eskaini nahi den, ingurumena zaintzen lagunduko duten ibilgailu garbietan oinarrituta.